Дург1ели, рях1ятли, гьамадли

МяхIячкъала – Дербент мегьла гьунчир электричкаби дашули лерниличила багьурхIейчирад, ну электричкаличир Дербентлизи рукьес гIяхIцадхIи хьулрикIули лерсири.

Диванничи кариили калес дигули хьалли, «кабикибси къаркъала уди шин дашути ахIен», - бикIуси урусла бурала пикрибарили, алхIят бархIи архIяличи дурарухъунра.

Нуша сунечи кадиибси электричка сагасири, ишбархIила лерилра тIалабуначи балбикибсири, ряхIятли кайэс вирути утни, бухIнабси умудеш, гьарзадеш, уркIи разибарестири. Дебали дигеслири минуталра кьанхIебиубли, сунела заманаличиб электричка гьайбирули биъни. Дебали малхIямси контролёрли, нуша кадиибси мерличи билетуни хиб. Илдира, сегъуналра къалп агарли, кассала чекличил дирцулри. Дигеслири, багьара бахъ халаси хIебиъни, МяхIячкъалализивад Дербентлизи 170 къурушлис аркулри. Гьунчиб поезд кIелра байхъала сягIятличи гъамси манзиллис кавлулри. Гьунчир къаршидиркути лерилра станциябазибра кIел-хIябал минутла манзиллис тIашбилзулри. Талги, Манас, Избербш, Къаякент, илдира гIяхIцад хIедурили калунти цархIилти станциябала мер-мусаличир Дагъиста халкьли шими делшири, илаб чула яшав-бирулри. ХIебиалли илди шимала халкьла гIямрулизира электричкали белгити кункдешуни хилри.

Электричкаличил гIяхIцад адамти пайдалабикIулри, дурхIначилти нешани, шадибгьунчи дурабухъунти жагьилти, чула архIяби дурадуркIути гьести гIямрула адамти.
Дербентлизиб, камси дила къуллукъ барили гIергъи, гIурра замана лебалри. Жявлил хьулрикIусири Дербентла гьаб-убла жумягIла мижит чебаэс. ГIямру деркIили, мякьлаб лебси илгъуна дурхъадеш чехIебаили калниличи пашманриубра. Мижит марлира нушала дурхъадеш, мурхьси тарих, рухIла давла, баракат сабри, нушала халкьла жявхIейчибадси, чеббикIибси устадешла, гьаннара тIашли лебалси бикьри сабри.

Сунела жагадешли ну уркIаибси, Абу-Дабила ЦIуба мижитличибра чебяхIси, чебаэс лайикьси саби или пикрирухъунра.

Мижитла азбарлизирти даршани дусмазир тIашти платантани даршдусмала бархбас ва баракат ахIерабирули сари или гьанбикиб. Ма ша Аллагь.

РухIла арадешличил барх, чархла арадешлисра архIя пайдаласили бетаур. Хьурали Нарын-Къалализи черяхIяхъира, Низами-Гянджевила уличилси парклизир къунздухъунра, вецIал километрла гьуни хьурали ахъира.

Дякьунтиван ряхIятли чарра диубра. Электричка, кьанхIебиубли сунела заманаличиб бакIиб. Вокзалла мякьлабси чяйханализиб даршал къурушлис чяйник чяйла лугулри.
Халкь пайдалабикIахъес илдигъунти кункдешуни акIахъубтас баркалла дикIули хъули чардиубра.