Шагьарлантала х1урмат х1ебирух1ели

Беркес кьацIра, держес шинра, бекIла чедиб бурхра, узес хIянчира, хъалибаргра, дигира адамлис чараагарли гIягIнити сари. Илдачил къяйли гьарил адамлис чараагарли гIягIнили саби сай валутала ва сунени балутала хIурматра, хатирра. ХIурмат агарси адамла сархибдешуни, гьарбизуни, сунечи сунела ва сай-алавтачи уркIила разидешра биэс бирули ахIен.

ХIера, илкьяйдали, чула хIурматагарти, иличибли чула уркIилизиб разидеш агарти адамти бахъбаалли, лебилра жамигIятлизир дархибти тяхIяр-кьяйда детарули сари.
УркIилизиб разидеш агарти адамти хIербируси мерличир сархибдешунира, гьарбизунира, баракатра диэс дирули ахIен.

Нушала шагьарла маршруткабачибти адамтала дяхIличи хIеррикIули рирус. Дунъяличи ва чучи саби разити рахлира къаршихIебиркур. Лебилра, гIурра камси яхIбарес, сабурбарес пикрибикIули ибкькабизуртиван бирар.

Илдала разиагардешлис дахъал сабабтазибад ца, чули чула хIурматбирули, маршруткаличи кабиили архIя дураберкIес имканти агни саби.

Гьанна гIяхIцад дусмазиб ил масъала нушала шагьарлизиб чилилра арзес бирули ахIен. Дахъ дебали дицIили, илдази адам ухIнаухъес ва илдачивад кацIес тяхIярра агара. Халкьли, гьар бархIи, гьужумличил, маршруткализиб тIашкабизес мер бургули, чула масъулти бекIдирули сари.

Ца бархIи, дай хIерила замана маршруткаличи кариэс хIяжатбикиб. ИлхIели машинала бухIнаб бахъал тIашкабизурти аги, иличибли халкь кабирути мерани чедаэс вирулри. Шагьарла халкь сунечи кабиили бикуси маршруткала куцагардешли дила гьав буун. Кабирути мерани дахъ дуркьдиубли делкири, гъярдердибти чехолтазирад мочалкаби гьарадикIулри, алавкадуцибти чIянкIи гъярдердилри.

Илгъуна маршруткаличи кайили архIя бируси адам сунечи сай разили виэс хIейрар, дила пикрили. Дахъ куцагарти маршруткаби, чус хайрилис пайдаладирутала, шагьарла халкьличи хIурматагрила лишан сабливан кьабулбарира илгъуна хIякьикьат.
Халкьли биалли, савлила бархIехъла манзил илди далагардешуни чедиулира ахIен, сегъуна-дигара биаб маршруткаличи ацIили тIашкайзес виубси, мурадли ваибси, игъбарли варгибси ветарули сай.

Шагьарла маршруткабала масъала, чили мурт арзалра, илхIейчирад дехIдирхьур шагьарла сархибдешунира, гьарбизунира.

Дигахъира илгъуна бархIи МяхIячкъалализиб биубцад жявли бакIили.