Такьсирличи мешуси биаб танбих1

Гьарил адамлис лерилра дунъяла давлумачибра дурхъаси сунела чархла арадеш саби. Адамти тухтуртачи чус бегIлара къияндикибси замана, арадешлизиб нукьсандеш акIубхIели, дугьабилзули саби.


Гьарил дугьаизурсиличи лехIяхъили, илала буруси аргъили, зягIипсилис кумекбируси тухтурра халкьлис кумеклис вархьибси малаикгъуна сай. Амма тухтуртира адамти саби, адамти биалли сегъунти-дигара леб.


Ишдуслизир наб декIар-декIарти тухтуртачи дугьарилзес чараагаардеш акIуб. Илдала кумекличил ва дила гъираличил арариэс имканбакIиб, гьанна шукру алхIямдулиллагь рикIулра.


Амма, гIяхIцад ну чучи дугьаризурти тухтуртазибад гIяхIти журналистуни, писательти, поэтуни бетаэс бири или бурес рирус. ЗягIипсиличи лехIбизес, изала кабизахъес, илис дарман чеббикIесван ахIи, арадешличила, зягIипдешличила хабурта бугьес ункъли балулри илдани. Лебилрара-сера тухтурти, духути, багьудичебти, чули чула багьа балути адамти сабри, амма илдачи чилра, гьачамалра хъарахъили хIейгахъира. Хаслира, нуни чучила бурутигъунти тухтуртачи.


Гьанна нуни буруси, зягIиприкес гIяхIцад гьалаб бетаурси саби. ЛихIбани вайтIа бикьни багьандан поликлиникализирси тухтурличи дугьаризурра: «Вайли бикьулра, се бирусил, чичи дугьарилзусил гIеббура, рирадли хIуни кумекбара», - рикIулра илизи. Матъал кумекбируси хIукуматла полис лебли биалра, тухтурличи гьайгьайрагу дацIти някъбачил хIерякьунра.


Тухтур, набчил ихтилатрикIули, шел минутра кахIелун, дила лихIбачи, гIядатлис биалра хIерра хIеиб. «ХIед дигадли – рикIар – центральная больницализир лихIбала отделениела заведующая лер, илала дилайчирра гIяхIти кумекбарес имканти лерти сари. ГьарракIи иличи, нуни илизи хIечила бурис, жагIял хIери баайчи ил хIечи хIерли рирар». ГIяхIси тухтур раргира или ну разириубра ва баркалла багьахъурли поликлиникализирад аррякьунра.


ГIелабил бархIи рякьунра илини рурибси отделениела заведующаячи. Илини дяхI шалали кьабулрарира. Дила савгъатра столличи кабихьира.
Илра набчил рахъхIи гъайхIерикIи, я дила лихIбала даража багьес илис хIяжатхIебикиб. «ХIела игъбар бетаурли саби, - рикIар, - ишав узуси профессор, жагIял ахIи, царахIел отпускличи аркьуси виъни, жагIял савлиличивад хIянчиличив вирар, илини хIу кьабулрирури. Профессорли нуниванра ахIи, секIал ункъли бала, иличи дугьаризи». Ну дебали разириубра, профессорли кумекбаралликIун дила лихIбани лерил секIал дикьес дехIдирхьур или пикрирухъунра. Заведующая биалли, дила секIал камли дикьандиубти лихIбачи хIерра хIеризур. Илисра халаси баркалла багьахъурли, ну аррякьунра.


РакIира гIелабил бархIи профессорличи. Лебтанилра балуливан, профессортачи зягIипти дацIти някъбачил башули хIебирар. Нура илкьяйда сарри рякьунси, урези-урехиличил, халати адабличил.


Ил чеваэсра гьарли-марси профессор сайри. Хъябличиб галстукра лебри, цIуба халгIятра, фонендоскопра. «ПикридулхъехIе се баралли гIяхIсил хIела лихIбас. ВецIну шура бархIили, - викIар, - нушачи Москвализибад лихIбала тухтуртала кьукья лябкьуси саби, хIуван дугьабилзути бахъбаили Москвализибад тухтурти тIалаббарес чараагардеш акIубли саби. Илдани, тах шагьарлизирти, гьаладяхI ардякьунти технологиябачилти гIягIниахълумира чучил дарх лерхути сари. Администраторлизи хIела телефонна номер беда, тухтурти иша бакIибхIели хIечи зянгъдирхъу». Ну, тухтуртани зянгъдирхъу или, вецIну шура бархIи ахIенну, базра имцIали хIерли калунра, амма чилилра зянгъхIедяхъиб. Илкьяйдали цалра тухтурли чехIедаили, камли бикьули дила лихIби гьаннара лерал. Гьанна, кумекбарахъес цархIилти гьундури даргес умцIулра.


Илди тухтуртани, балу-балули, риргIяриргира или наб гьанхIебикиб, ишдусла дуцIрумлизир, тяп гьаларла лихIбала тухтурличи сагали дугьаризес чебуркъайчи.
ДуцIрумла жагаси аргъ биалра, хIеряргIили риасра, баягъи ит ковидличи мешуси изай чарх буциб. ХIейгеси вирусла изала набчи гьалабра чебуркъубсири, ил сегъуна сабилра балулри. ХIянчиличи рашес гьунар аги, ну гьарли-марли зягIиплири, больничный абхьахъес гIягIнилири. Хъулир, наб нуни къуллукъбирули, сагъриэс хьулрикIулри.


Рякьунра поликлиникализи. Иларси нушала участковая тухтур отпускличир сарри. Илала мерличир рузусира, «нура жягIял отпускличи аркьулра, кумекбарес хIерирус», - рикIар. Дила челукьути пикридарили, кьакьрумала, къянкъубала, лихIбала тухтурличи дугьаризурра.


Дила дурутачи лехIризес тухтурла замана аги. «Илгъуна даражаличир хъулир калес асухIебирар, хIела бекIлизиб се лебал бусягIят чебиахъу, МРТ барахъес рурхьури», - рикIар. Сунени белкIунси кагъарличил дугьаизалли, МРТ матъал бируси биъниличилара буриб тухтурли. Дила изайчила, чархла температураличила, сецадхIи зягIиплирал, селра хьархIебаиб. «Хъулир калес дигахъира, ну хIянчиличи рашусира, рашес хIерирулра», - ира. «Изала кахIебизахъурли больничный белкIес хIерирус, нуни белкIаслира заведующаяни къулбасхIебиру, больничный белкIес багьандан МРТ-ла баянти гIягIнили сари», - рикIар ил.


Тухтурли ибси хIебарес хIериубра, къияйчил гьигьрикIули, майъали кIантIрикIули риасра, рякьунра МРТ бируси мерличи. Набчи ярга гIергъила бархIи хIерейс биулри. «ХIела игъбар бетаур, - бикIар илабти, - хIечи жагIял ярга биули саби, цархIилти жумягI, кIел жумягI хIерли кабирути саби».


ГIелабил бархIи ракIили барахъира МРТ. Ила рукьес багьандан, халаси яхIбарили, кьяшмачи каризурра. ХIялагарлири, хIилхIи кьяшмачи тIашлири. Илавра чинавалра цалра тухтур чехIеира. Барибси МРТ-ла жаваб жагIял хIерила гIергъи лугехIе бикIар. Ил бархIи поликлиникализирси дила тухтур хIери баайчи сарри рузуси.
Илкьяйда, МРТ-ла суратличил ва суратлизиб се чебаахъилил буруси кагъарличил, поликлиникализирси тухтурличи жумягI бархIи раира.


Ну цаван къияйчил гьигьрикIули, халаси ахIенси температураличил, мурталра майъалиралтули лералри.


Тухтур набчи хIерра хIеризур. МРТ-ли барибси диск белчIес дила компьютерла гьунар агара рикIар, хIела изайчила нуни селра бурес ва багьес хIерирус. ХIела къянкъла операция барахъес больницализи рурхьури, дила кагъарличил илдани хIу гъай агарли больницализи рурцури, илаб устадешчебти хирургуни лебти саби. Барили операция, илдани хIу, бусягIят арарирури.


Дила гъайрикIес гьунар аги. «ХIед халаси баркалла, хIела кагъарра гIягIнили ахIен», - ира. Нуни хибси дурхъаси чяйла кьарла пачкара, конфетунира кадихьибси кьачара барх касили, иличирад аррякьунра.


Лебилра дунъяличибти тухтуртачибад уркIи бухъун, шагьар булан бархьбатурли дубуртазибси дила юртлизи аррякьунра. Илаб умуси гьавали, дубурла шинни, бухъянси заманали гьамаддеш акIахъуб. Амма хIянчиличир далагардешуни детаур. Лебтанилра балуливан, яра узес гIягIниси саби, яра больничный биахъес, цалра агара диалли, арцра хIедирар.


Набчил илди авара дарибси тухтур гьаларра гьаннара ца риъниличила арариубхIелицун пикрирухъунра, шагьарла арадеш мяхIкамбирути мер-мусаличибти тухтуртачил илала гIяхIти бархбасуни лер. Сунечи дугьабизурти ита-иша бурхьули, сунечи селра чехIейсули, гьарил бархIи рузули сари.
Иличи чилилра гIяйиббаресра хIейрар. Сунес балбикибсиван сунела хIянчи бирули сари.


Ну биалли, мурт биалра вегIли барибси вегIличи чарбируси саби или пикририкIулра. Сунела такьсирличи мешуси танбихI иличи биъниличи рирхулра.
Ца гIяхIдеш, илдигъунти ахIенти, гьарли-марти тухтуртира лебли биъни. Илдачилара хIушази бурес пикри леб.