Къачхы чапракъ бла чыгъанакъ

Къатхан чапракъла бла, къуру чыгъанакъдан,

Созулма ханс бла, къатхан лана сабдан,

Къач деметни этиб, терезеге салдым,

Сора анга къарай терен сагъышландым.

 

Джаз чапракъ джашнай эд мийик бутагъында,

Лана да чагъа эд эркин таласында,

Созулма сюе эд кенге керилирге,

Чыгъанакъ тура эд сюйюмсюз бир джерде.

 

Алай заман келди бары тозурады,

Ёлюмню бетине сюймейин къарады,

Учхан, джюрюген да къара джерге тюшдю,

Ахыр кюнлеринде тенг болду, бирлешди.

 

Мийик бутакъдагъы уллу кёллю болма,

Тюбюндегилеге огъартын къарама,

Аламда хар барлыкъ тенгди бир - бирине,

Бир - бирине байланч, керекли джеринде.

 

Бир кюн джерге тюшер учхан, сюркелген да,

Къуртха тенгиш болур кёкде керилген да,

Джер дегенинг-къазан, барын эритиучю,

Джангы кепге салыб джангы тирилтиучю.

 

Чапракъ, чыгъанакъ да бир топракъда да чирир,

Джангы сыфат бла дуниягъа келир.

Аламны шартыды - тугъан, джашау, ёлюм,

Андан къутулалмаз, не алим, не залим!

 

1999. Анкара.Турция.