Къачхы чапракъ бла чыгъанакъ

Къатхан чапракъла бла, къуру чыгъанакъдан,

Созулма ханс бла, къатхан лана сабдан,

Къач деметни этиб, терезеге салдым,

Сора анга къарай терен сагъышландым.

 

Джаз чапракъ джашнай эд мийик бутагъында,

Лана да чагъа эд эркин таласында,

Созулма сюе эд кенге керилирге,

Чыгъанакъ тура эд сюймей бюгюлюрге.

 

Алай заман келди - бары тозурады,

Ёлюмню бетине умутсуз къарады,

Учхан, джюрюген да къара джерге тюшдю,

Ахыр кюнлеринде тенг болду, бирлешди.

 

"Мийикледе учхан", уллу кёллю болма,

Тюбюндегилеге огъартын къарама,

Аламда хар барлыкъ тенгди бир - бирине,

Бир - бирине байланч, керекли джеринде.

 

Бир кюн джерге тюшер учхан, сюркелген да,

Къуртха тенгиш болур кёкде сюзюлген да,

Джер дегенинг - къазан, барын бишириучю,

Джангы кепге салыб, джангы тирилтиучю.

 

Чапракъ, чыгъанакъ да бир топракъда чирир,

Джангы сыфат бла дуниягъа келир.

Аламны шартыды - туууш, джашау, ёлюм,

Андан къутулалмаз, не алим, не залим!

 

1999. Анкара.Турция.