Суукълукъ

Суукълукъ, сен ие болдунг юйюме,

Джарымазлыкъ ышан салдынг кёлюме,

Эркишими гыбыр хоншу этгенсе,

Джюрегиме мыдахлыкъны чертгенсе.

 

Джашайма да - юйюр джылыу юйде джок,

Къояма да - кетер джерим, аркъам джокъ,

Атам, анам суукъ къабыр орунда,

Эгеч, къарнаш - хар ким кеси джолунда.

 

Не этейим, кимиме баш салайым,

Мындан кетиб, энди, къайры барайым,

Ёмюр десенг - асламысы кетгенди,

Тамыр этер заманым да джетгенди.

 

Джюрек а бой салалмайды, сынчыйды,

Джашауму бу халына ачыйды,

Тёрт джанымдан джауум, эме, сёлеше,

Джакъсыз къалдым аманла бла демлеше.

 

Бир джанымдан - уу джайгъанлай, зарлыкъ бар,

Бир джанымдан - керек табмай, тарлыкъ бар,

Эркишим да  хаулеликге алланыб,

Кёбге тёздюм болмаз затха алданыб.

 

Бой салмаучу бир адамлыкъ - къанымда,

Тыйыншсыздан кери туруу - джанымда,

Тенг дегенинг - тенгсинмезлей, кёрмезлей,

Бир хал барды чыдаялмаз, тёзмезлей.

 

Джуртум  десем - джан джылытхан бир къала,

Халкъым десем - эслемеген бир ана:

Терсни - тыйыб, тюзню алыб акъламай,

Керексизге ачыгъанын джакъламай.

 

Кетеме да, тыш джерледе, джан - ауруу,

Къалама да, былай джашар джокъ къарыу,

Арсар болуб, акгыллылыкъ джан джагъа,

Да къалгъанма кёлеримден джаш агъа.

 

Къадар мени энтда сынар - сынайды,

Не этер деб сеириме къарайды,

Къалыу - ачы, кетиу - умут, къобайым,

Бел къатдырыб тыш даулетге барайым.

 

Болмаз затны созулгъаны - керексиз,

Ит джыйын бла тозар болдум, ишексиз...

Да, Аллахым, ёксюзюнге тиренч бол,

Кесинг къору, кесинг тюзет манга джол.

 
1993 дж. Черкесск.