Даргала халкьла дурхъаси х1укумат

Дагъистайчила, имцIаливан даргантачила тарихла баянти гьандуршухIели, хIушала пачалихъ лебси ахIенри, хIуша жяв заманала жамигIятла низамличил хIердирутири бикIули бирар. ИлхIелира чилилра пикрилизи кайсули ахIен сегъуна чебетаибси, дунъяла халкь, лебилра чула тарихлизиб сунечи хьулбикIуси, бархьси, хIекьси, адамтала гIямрула лерилра шалубачи чебетаибси, Халкьла хIукумат (демократия) бузулрил даргала шими махьурбазиб ва жамигIятуназиб.


Жяв замунтачибад бехIбихьили даргала шими-махьурбазив гьарил мурул адам кайзурси гъабза вирусири. Сунела гъабзадеш, адамдеш чизилра мучлаагархIедарахъес багьандан гьарилли, вайлиуб бигьи, ханжал бихусири. Ханжал гIямрулизиб гьачамалра хIяжатхIебикесра бирусири, вайлиубси ханжай мурул адамтазир гъабзадеш, адамдеш, хьунул адамтала, рузбала, рурсбала, умудеш, асилдеш, гьар бархIи ахIерадирутири. Вайлиуб ханжалван, сабурра, бархьдешличи кайзурли хIерирнира гьарилла уркIилизиб биэс гIягIнисири. Илдигъунти къиликъуни чузир агарти наслуби, дила пикрили, цадехIли цадехI къирдарили, даршдусмала даимдешлизир кIундацIиб.


Илгъуна бархьси, халкьли чули чус бекIдеш дируси, жамигIятуни-ургабси низамличи бакIес багьандан, гIяхIцад наслуби черкадерхурли, илдала гIякьлу халкьла уркIбазиб кали бургар или пикририкIулра.


Даргала шимазиб, гьарил шайчирадти, лерилра ихтиюрти сунезир лерсили бирусири шантала гумай. Илаб вайсира гIяхIсира чула пикрумала умцантачиб умцурли, гьар секIайс кьимат кабалтусири, гьарил баркьудила чебкад бархьси хIукмура дурайсусири.


Шантас гIякьлу буруси, зегъа бузахъуси, лебилра шилис бекIдеш дируси адам чула ургавад шантани чеввиркIусири.


ЧеалкIуси наслу шантала гIядлу-зегъализиб ва бяркълизиб халабиутири.
Илгъуна бархьси хIукумат чучиб кабизахъес бургъути Европала ва урусла халкьли гьачамцун ахIи диштIатира, халатира инкьилабтазир хIила хIуркIби каиб, амма илаб гьаннара гьарли-марси халкьла хIукумат агара. Ишди бурхIназиб нушани чебиулра, сегъунти куцагарти адамтани Европалис гьуни чебиахъулил. Виктор Орбан сунела духудешличил илдазивад декIарулхъули сай.


Ил багьандан дарганти, нушала халкьла гIядлу-зегъа, дархьти пикруми, чичилра хъархIерагардеш, чула яшав-барес устадеш, тухумтачилти, унрубачилти, миллатуни-
ургарти бархбасуни лебил дунъялис гIибратли диэсти сари.


Гьанна хIердирули лертани, лерилра даргантани, нушала хала бегIтала сархибдешуни ахIерадарес, нушала чеалкIутази гIерасахъес чараагарли гIягIнили сари. Иличибра гIяхIси, дурхъаси, гIямру деркIес багалабиэси дунъяличиб селра агара или пикририкIулра.