Расулгъа

(анамы, Ёзденланы Байдыматны(Патимат) дерслеринден)

Саяуну къорукъ тыяды,
Терини къыйгъыч къыяды,
Темир ишлетген - кёрюкдю,
Къой кютген джалчы - джюрюкдю.

Къонакъгъа баргъан - къонакъды,
Баштёбен адам - тумакъды,
Зарлыкъ этиучю - пасыкъды,
Джыр, кюу этиучю - ашыкъды.

Юй, джер сакълагъан - сакълауул,
Чекни кёзлеучю - къарауул,
Таша сыр билген - тахсачы,
Джерде уруннган - сабанчы.

Чалкъычы чалгъан - дюрюдю,
Къол бла эшилген - ёргюдю,
Текебёрк оюн - кёрмючдю,
Саблы джалгъаууч - чёмючдю.

Болгъанны айтыу - хапарды,
Уллу суу-лобан - суусарды,
Ётюрюк айтыу - джалгъанды,
Сан арыгъаны - талгъанды.

Конакъны алгъан - къонакъбай,
Асыл ат тайы - генджатай,
Уллу ат сюрюу - джылкъыды,
Сууну къобханы - ырхыды.

Къарагъа дженнген - къараууз,
Бал четенинде - балаууз,
Джукъа кёк бетли - кёксюлдюм,
Къымылдыу сабий - тебджилдим.

Бачханы чеги - ырджыды,
Булбул къанатлы - джырчыды,
Чизиулю къумач - талгъырды,
Ариу тиширыу - алдырды.

Джерде ёсген зат - битимди,
Адамны иши - этимди,
Джер берген ашау - джемишди,
Кючлю къадама - къангишди.

Акъны мутхузу - акъсылды,
Аз маджал деген - такъылды,
Терекде ёсген - кёгетди,
Кёб терекли джер - чегетди.

Кёксюл - дейдиле кёкчагъа,
Кириш - дейдиле сенчагъа,
Субайсан улан - зарифди,
Джуукъсуз адам - харибди.

Хуна дагъаны - тиреудю,
Джангыз бир адам - биреудю,
Эки адам а - экеулен,
Юч адам болур - ючеулен.

Тёртге - тёртеулен - дейдиле,
Асыл адамла - бийдиле,
"Сен-Уллу" - дерле онглугъа,
"Кесамат-ишчи" - джалчыгъа.

Бийчеси ёлген - къара-тул,
Биринчи улан - тунгнгуч ул,
Самыр - дейдиле къош итге,
Син-беллик - дейле бел кепге.

Чакъгъыч чакъгъаны - джилтинди,
Кенгни бир аты - эркинди,
Кёз джыламугъу - кёз джашды,
Шат - деген адам эл башды.

Дженгил джюрюучю - джумулукъ,
Тауушлу быргъы - къодулукъ,
Сёз сюйген адам - сугъулту,
Гыбыт къобуз а - угъулту.

Булутсуз кёкге - чууакъ,  де,
Джерсиз аджирге - джайдакъ, де,
Тукъум башчыбыз - Трам болур,
Къарачай миллет - шам болур.

Тил билген адам онглуду,
Ол хар джерде да джоллуду,
Сёз уста сёз бла баш джулур,
Билмеген таргъа тутулур.

Ашхы сабийде - билгелик,
Камсыкда - кемсиз ёрелик,
Халкъны сёзюне тынгыла,
Айтылгъанланы ангыла.

Уста сёз болсун тилингде,
Хошкёрю болсун кёзюнгде,
Онг болгъанлагъа тенг болгъун!
Солгъа кетгенден кенг болгъун!