Бургьаб, Аминат, х1ела пагьму

Аминат Г1ябдулманаповас

Пагьмучерси даргала поэтесса Аминат Г1ябдулманапова нешла мез калахъес, илди гьаладях1 дашахъес багьандан лерг1ер къкайгъилизи рикибси, ил мурадличил чумра районнизи, чумра шилизи раибси автор сари. Шагьарла журала школабизир детурхути, дарган мез руркънилис багъишладарибти  мероприятиби Аминат Г1ябдулманапова агарли дурах1едурк1у аллира, къярна бетх1ерар.   
Сенах1енну дурх1назир нешла  мезличи диги адилкьнилис хасдарибти конференциябачир, конкурсуначир, вечертачир ил камх1ерирар, гьарил инсайс вег1ла мез дурхъати ва ах1ерти диъниличила,  илди мезличил лук1уси адамла гьар чинабалра х1урмат ахъли биъниличила, чеалк1ути наслубазир дарган мезличи диги адикьес г1яг1нили биъниличила, илгъуна х1янчи барес багьандан «Лачин» журналла имканти лерниличила гъайрулхъан.
Дахадаевла районна Хъярбукла шилизир 1946 ибил дуслизир акIубси Аминатли миллатла рух1ла давлаличил чумра дарганна урк1и разибариб, сенах1енну илини сари ак1убси шила школализир, Дагъиста пединститутла физико-математический институтлизир, Москвализибси М. Горкийла уличилси Литературный институтлизир руч1ух1елил урк1и гьаргти, адамтачи дигичерти назмуртачил девла устнала ва буч1антала пикри сунечи бях1чиаиб.
Тухтурли рузули калунси, амма сунела агри жявли дурх1нази багьахъес чебуркъубси нешличила, мегьла устала х1янчи асилдешличил бируси дудешличила Аминатли дигили диц1ибти назмула чумра тугъ дуракаиб. Авлахъла х1янчилизивад акьуухъунх1ели, миршби, къялкъни дируси дудешлис пушни пушдарес кумекбируси, иличил рарх авлахъла х1янчиличи рашуси Аминатла т1абиг1ятла жагати суратуни назмула агиличил зайдик1ахъес пагь жявли дак1убухъун.   Х1ера, се рик1улил ил «Х1еб» бик1уси назмулизир. 

Х1еб

Х1ебли х1улрук1ахъили,
Гьаргала кариц1улра,
Х1ерсиван чучи дунъя,
Назмуртани лук1улра.

Забра кьутдик1ули сар
Х1ебла гьела делг1ули.
Шиниша кьаламти сар
Авлахъуни рурхьули.

Х1ебла г1ях1ял чат1ара
Саб далуйта буч1ули,
Кьалам касадли дугьби
Нуни дурис бик1ули.

Художественная литератураличи карц1си поэтессала назмурти районна ва республикала газетабазир, «Гьалмагъдеш», «Лачин» бик1ути ва царх1илти журналтазир дураибтири. 
Даргантас тяништи сари илала «Ах1ерти адамти», «Неш хъайг1ирх1ели», «Унеу», «Хъярбук», «Поэт» бик1ути  ва дахъал царх1илтира жузи.
Гьанна ил «Лачин» бик1уси журналла бек1 редактор сари.  Дурх1нас хасбарибси журнал жагасили бетаахъес къайгъичерси Аминатла г1ях1дешли ил белч1ес иштях1сили бетаурли саби.
Халкьани-ургарти, Лебил Россияла ва Дагъиста Республикала конкурсуначир чуйнара чедибдеш сархибси х1ед, Аминат, арадешра, разидешра, талих1ра дулгулра! Тяп лерсиван адамтас урк1и гьаргли, х1ела пасих1си пагьму гьат1ира мурхьра бяг1ура бик1ули, г1урра х1ед дигуцад х1ерриаби!