Нешлис ургъенгу, дудеш

Салмай Артур, дедили дибг1янти машинтира, х1яз барахъес катур. Сай биалли газетали уч1есииб. Циила замана арбякьи г1ергъи, х1янчиличив вамсурси ил, шакра х1ейкили ускаун. Артурлис азаддеш бикиб. Дахъал дагьес дигуси хъяшали дудешла шкафуни, тумбочкаби, ящикуни къяйц1дариб.
Селра сагаси х1ебаргили, ил кухнялизи ац1иб. Хапли илала х1ер нешли гьаларван асибти хъабначи бархьбизур. Дях1иван ц1убиби, жагали някьишдарибти, къуббабизурти чебхьлумачилти илди хъабни х1ясибдиресииб. Г1ур ил, уталичи ац1или, матях1 касес зузик1есииб. Дишт1ати бач1назибад дек1си хъаба батбухъун – ч1ябарличиб зела бек1а багьарбиуб. Уршили к1иибил хъабара касили, бях1каур – удиб содала бек1а багьарбиуб. Х1ябъибил хъабализир крупа сарри. Уршили ил хъабара бац1бариб. Авъибил хъабализирти бет1ура ч1ябарличи какьур. Артур х1улук1иб:
– Х1ерагу, сегъуна жагати дубурти детаурал... Ишди «дубуртикад», х1усбулхъличирадван, машинти дикес вирар. – Артурли бек1ани ца бара диркьдариб, тяп рульла г1ела кайибх1еливан, гъугъик1ули, цалис г1ергъи ца машинти дикесииб. Х1язлизи ахъибси ил, больницализирад чаррухъи, кухнялизи неш арац1ниличи шакра х1ейкиб.
– Гьуя, нешла г1язиз, ва Артур, се барри х1уни? Се ц1ахдеша иш ч1ябарличибси?
– Неш, ну г1яйибла вег1 ах1енра: хъабни сари-сарил кадикиб.
– Х1у сеннира се-биалра букьх1ебуи, уэс вирули ах1енри. Т1ашизи, х1ед нуни се бирисал, – вяввариб ил нешли.
Хъяша дудешличи гьавухъун:
– Нешлис ургъенгу, дудеш, рахъ вайт1а маймайрик1ули сарину.