Игитуни х1ебубк1ар

Бек1либиубти игитуни:

Мях1яммад – Военно-медицинская академиялизив уч1уси студент, вуз таманаили г1ергъи, тухтурли узуси.
Руслан ва Х1яйдар – барх буч1ути Мях1яммадла юлдашуни.
Разиятра Зубариятра – Мях1яммадличил барх буч1ути студенткаби.
Зяг1ипти – дургъбала бут1акьянчиби.
Тухтурти.
Анзират – Мях1яммадла неш.
Разият – Анзиратла ашна, Х1яйдарла неш.
Бялг1яличи цалабикибти халкь.
Зикру бируси дубурлан.

1 АНЦ1БУКЬ

(Медакадемияла общежитие. Ца хъулирад делхъла агурби, далайла макьамти, дукелц1ила т1ама чедихули сари. Столтачир жура-журала хурегуни сари. Студентуни, нушачив чилра талих1чевси агара бик1утиван, разили саби).

Руслан. Ак1убси барх1иличил мубараквирулри, узи Мях1яммад! Х1ед жагаси рурси рикаб, исбагьи рурсби ак1аб, нартани уршби ак1аб! Нешли ва дудешли пахру бареси тухтур ветааби! Шанта х1урмат биреси гъабза ветааби!
Мях1яммад. Баркалла, дила юлдаш, х1елара урк1ила мурад бааб! Чарх арали калаби!
Х1яйдар. Гъану х1ябра дусличил, Мях1яммад! Даршлим гъану х1ябра дус иш дунъяличив г1урра х1ериаби, баракатлизир, мас-давлализир г1ямру дерк1аби! Дерхъаб!
Мях1яммад. Дила мякьлар х1ушара каммадаркьаба! Дерхъабая ва дахъдаабая, дила юлдашуни! Х1ушабра талих1ла пай бааб! Х1ушани дила урк1и разибируливан, х1ушала урк1бира Аллагьли разидараб!
Руслан. Игъбарли х1ура г1евуцаби, Мях1яммад! Амма ишди дахъал гъайличир далуйти г1ях1ти дирар, или гьанбиркули саби. Гьари, рурсби, башахъеная Мях1яммадлис г1урра ца жагаси далай!

(Далайлара делхълара агурби зайдик1ули сари, Разиятлира Зубариятлира ярга-яргали х1ябкубти дуч1ули сари. Жагьилти булхъули саби).

Разият.
Дубурла вава-кьарлис
Берх1ила нур дигахъу.
Дила ц1удара х1улбас
Х1ечи х1ерэс дигахъу

Зубарият.
Дехьлиубси хьанц1 лагьа
Х1ерли бирар декьличи.
Даим нура х1ерлира
Ца х1ела дигайличи.

Разият.
Варъала муридешли
Мурч1алира ч1ямбиру.
Талих1черти дигайли
Шишимти гьарахъдиру.

Разият.
Берх1и г1елабикалли,
Вавали бек1 къух1бурцу.
Юлдаш гьарахъикалли,
Дай урк1и дардли бурцу.

Зубарият.
Муси дирихь дак1алли,
Шурми шинни к1ант1дик1ар.
Х1у урк1ила вак1адли,
Урк1и бахъ кьакьабик1ар.

Разият.
Къукъудик1ар гъагулти –
Заб-марка диру вара?
Х1ела дях1 чех1ейули,
Ях1барес рирус вара?

Зубарият.
Барх1и вачарли бурк1ан,
Дила дурашан Шалда,
Дуги улхъули бурк1ан,
Ва дила Бацла Шала.

Разият.
Урк1илис кьабул юлдаш,
Риганай лерал, бура.
Х1у варкьиб х1ела нешла
Хьул чичи сабил, бура.

Зубарият.
Дярг1иб шинна г1инизван
Дигайли диц1иб х1улбар,
Дегъдешлизиб кьуллаван,
Марли, веткайхъуд вара?

Разият.
Далуйти-делхъаначил
Г1ялам халкь г1яшикьбиран,
Разити масхуртачил
Шишимти черардикан,

Зубарият.
Х1ердарибти х1улбани
Дибг1ян махьурби диршан,
Дила сирх1ян сурях1и
Калаби х1у арали!

Разият.
Дяг1ван хъярхъ айгъирличил
Диркьурби чедидирхъян,
Дила кьяш кункил Жайран,
Калаби ара-сагъли!

(Далайлара делхълара агурби т1ашдизурмад, лебилра хъатбик1ар. Х1яйдар юлдашличи дугьаилзан).

Х1яйдар. Мях1яммад, х1ела жан дат, бурагу, илцад жагали улхъуси х1у, белч1уди таманаили г1ергъи, г1яртист ветарудал, чинав узес пикри лебал.
Мях1яммад. Валлагь, дила узи-уршби, чинав-дигара узес х1ядурлира.  Далайх1ей1еси ва улхъх1елхъеси барх1и чисалра мабак1аб! Амма Военно-медицинская академия саби нушани таманиуси. Х1ебиалли Ват1ай чина дархьаах1еллира, илар дузес нушала чебла саби.
Х1яйдар. Х1ела азир мурад даъ, дила узи, х1ябилра вархьли вик1ули леври! Г1е, дузра дузех1е, чина дархьаах1еллира. Нушани саби нушала саниг1ят чеббик1ибси. Ил саниг1ятлис марли кавлех1е!

(Г1урра далайлара делхълара агурби зайдик1ар).

2 АНЦ1БУКЬ

(Чебях1си Ват1а ва Афганиста дергъанала бут1акьянчибас хасбарибси госпиталь. Ц1уба халатчевси, хъябличибад михъирличи фонендоскоп жибжирбатурли, гьалакси Мях1яммад жагьил тухтур рурбани пишбяхъличил гьуниввалта. Мякьлавад шалг1евулхъуси Х1яйдарли сунела валликьянали т1ашиу).

Х1яйдар. Ягъари, Мях1яммад, х1у чина къалабасири? Х1ечирад х1улби черх1ейсути рурсби сен чех1ебиулри?

(Тухтур рурби урузбирар, шивк1ивра бухъи, чула х1янчурбази ихъур).

Мях1яммад. Вай-гьуя, дила юлдаш, зяг1ипти цаагили, жибик1ух1ели, рурсбала х1ерани х1ясибдарес тухтурла замана бирару?
Х1яйдар. Х1у илкьяйда шалг1евулхъадли, ихди исбагьиби х1ечи мяшт1ли бубк1аргу. Илдазибад цала биалра урк1и ванабара, итилтала х1езибад хьул бердахъа.
Мях1яммад. Х1яй, х1у арали ватла Х1яйдар, рурсбачи х1ерик1ес замана лебси х1ечи х1ерх1ебик1ули, сен илди, х1у вик1уливан, набчи «милигти» вара?
Х1яйдар. Ва дила юлдаш, х1ук1ун, тяп Камалул Баширван жагасири, биризван ахъсири, манай улугьван малх1ямсири. Х1ечи х1ерх1ебик1ули, г1ур чичи х1ербик1ути илди? Х1уван ну жагасили дигахъира, бег1лара жагаси рурси черрик1ес багьандан... Амма, чула жан датарти, къуймур рурсби дила шайчибях1 х1ерх1ебилзули кьадин.
Мях1яммад. Кьакьамайк1уд, х1ед кьисматли кьадарси Аллагьли камх1ерирахъу. Бирар х1ела хъулибра талих1.
Х1яйдар. Баркалла, дила юлдаш! Аллагьли лебтасалра илгъуна сяг1ят бак1ахъаб!
Мях1яммад. Амин! Лебилра талих1лизи ва баракатлизи кабатаб!
Х1яйдар. Я Аллагь, гьариллара урк1ила мурад бааб! Лебтасалра жагати рурсби бикаб!

(Госпитальла палатабазирад г1яшти музыка чедиху).

3 АНЦ1БУКЬ

(Х1яйдар дуц1ли Мях1яммадличи лявкьян).

Х1яйдар. Гьуя, дила узи, СВО бех1бихьили саби, бик1аргу...
Мях1яммад. Се саби СВО?
Х1яйдар. Дергъ... Сцециальная военная операция… Донбассра, Луганскра датахъес багьандан нушала г1ярмия ила арбукили саби, бик1ар. Гьарли-марти дургъби дех1дихьили сари.
Мях1яммад. Х1уни илди хабурти чинад касибти?
Х1яйдар. Т1ашбизагарли иличила сабигу телевизор ч1яркабик1уси.
Мях1яммад. Ну дежурстволичив сайри. Селра х1ергъира.
Х1яйдар. Сен х1у илкьяйда паргъатсири, селра бетх1еурсиван?
Мях1яммад. Вирхаэс вирули ах1енра х1ела хабуртачи.
Х1яйдар. Илди дила хабурти ах1енну, нушала улкала вег1 бек1ла х1укму саби.
Мях1яммад. Лех1кахъи гъари! Илди гъай-мезлизи х1ерхили, х1ечи хъарси х1янчи барадли, къулайли бирарну.
Х1яйдар. Х1у г1урра набчи вирхх1ерулри. Нуни бурусик1ун бархьси саби...
Мях1яммад. Гьаригу лех1кахъи, х1ела жайчира... Ишабти зяг1иптани илди гъай-мез аргъалли, нуша, тухтуртани, илдас кумекбарес х1едирех1е.
Х1яйдар. Зяг1иптала някъбазир телефонти хер. Илдани жявлил СВО-личила балули саби. Нушара илдачил дарх дахъх1и ках1евлех1е: дургъбазиб бяхъибтас кумекбарес дархьиэх1е. Х1у аркьяду?
Мях1яммад. Ват1ай чина дархьаах1елра, ила дукьес нушала чебла ах1ену?
Х1яйдар. Чебла кьалли саби, амма душма х1ярх1убани тухтуртасра урк1ец1и х1ебиру кьалли.
Мях1яммад. Ягъари, мурул адамван гъайик1ес мурт бурсиирусири х1у?
Х1яйдар. Ну иткъира мурул адамван гъайик1улра. Х1у сайри бурусила мяг1на х1ергъуси. (Х1яйдар гьимурк1ар. Гъузгъалдибиубти зяг1ипти тухтурти-алав цалабиркур).
Зяг1ипти. Мях1яммад Расулович, дургъби дех1дихьили сари, бик1аргу, мар сабира?
Мях1яммад. Се дургъби дирути? Ца-к1ел барх1или, Цхенваллизир кьяйда, чус къияндикибх1ели тиладибик1утас икьалабарили, т1ама-гьама т1ашдилзан.
Зяг1ипти. Нушала г1ямрулизир г1ур дургъби х1едирар или гьанбиркусиригу. Марлира г1урра улхану нушала халкь? Г1урра дец1ани чедиув нушала неш-дудешунани? Г1урра ц1уръабирару г1ях1гъубзнала дурх1ни?
Мях1яммад. Донбасслара Лугансклара халкь гьанна 8 дус х1ярх1убауб саби. Илдалара халкь улхули саби, илди г1ях1гъубзналара дурх1ни ц1уръабирули саби. Донбасслара Лугансклара халкьлис кумекбаралли, къалмакъар таманкадирар. Х1уша пикрумази дикеси селра агара. Дукьеная х1ушала палатабази, паргъатдиирая.
Зяг1ипти. Я Аллагь, х1у вик1усиван, ца-к1ел барх1или, Цхенваллизир кьяйда, къияндикибтас икьалабарили, т1ама-гьама т1ашдизаб!  Донбасслара Лугансклара халкьлис кумекбарили, къалмакъар таманкадиаб!
Мях1яммад. Амин, я Аллагь!
(Зяг1ипти чула палатабази аркьян. Госпитальлизиб г1яжаибси лех1деш чебилхьан).

4 АНЦ1БУКЬ

(Дявила авлахъличибси бункерлизи мерлабарибси госпиталь. Ила даргудути снарядунала, х1урх1бала т1ама-гьама чедихули сари. Мях1яммадли вяхъибсила дяхъурби дилгьули сай. Волонтёрти-санитартани сагали бяхъибти бургъанти госпитальлизи биахъули саби.)

Волонтёрти. Мях1яммад Расулович, илди хъябшти медсестрабачи хъарбарану, ишди дек1ли бяхъибтачи х1еризи! (Тухтур госпитальлизи сагали баахъибти бяхъибтачи х1ерилзан).
Мях1яммад. Ягъари, х1ушала хъали анк1или биц1, х1и т1ашаэсалра бажардих1едикирав х1уша?
Волонтёрти. ВСУ-шникуни бахъ зумали иртулигу, саби урх1ли кабушарти! Дергъла майдайчибад ишди бургъанти х1ушачи баахъес бикнира – халаси игьбар саби. Ишдаск1ун х1ушани кумекбиридая. Амма цацабех1 бургъантачи гъамдиахъес ВСУ-шникунани х1едатурра. Дергъ таманбиубмад, г1урра майдайчи аркьех1е, илдира иша биахъех1е...
Мях1яммад. Вай-гьуя! Се ибси «бургъантачи гъамдиахъес  х1едатурра» ибси? Сен илди кумек агарали дявила майдайчиб батуррая?
Волонтёрти. Ва дила узи, хъябхъяла миъбиван, къаршикартани х1ярх1убала ц1а челкьулигу. Се барес дирутира нушани илгъуна майдайчиб?
Мях1яммад. Вай-гьуя! Нуни х1****ас се барес дирутирал х1ушани илгъуна майдайчиб. Амма дергъ таманбиайчи итди бяхъибти х1ила кабурхар. Сен иша дак1ес ц1ахх1ебизура х1ушаб, чус къияндикибси манзиллизиб бяхъибти бургъанти, дергъ таманбиайчи, майдайчиб батурли?
Тухтурти. Се кумекбарес вируси бургъантас х1ярх1убала удиб?
Мях1яммад. Ва дила балликьянаби, х1ушани х1едикьулрав ишди волонтёртала гъай? Ишданик1ун бургъанти сегъуналра кумек агарли дявила майдайчиб батурли саби. Х1унт1ена крестличилси ц1уба байрахъалра ахъбуцили, бяхъибти иша баахъес г1яг1нилири.
Волонтёрти. Ц1уба байрахъ ахъбуцили хьалли, илини душмантала х1ярх1уби т1ашх1ейу.
Мях1яммад. Х1ебиалли бургъанти сегъуналра кумек агарли дявила майдайчиб батни бархьсилизи х1ясиббирулрав? Х1ебиалли х1уша дуэна ишар, ну аркьяс илди иша баахъес. (Медикуначи хъарбарили бяхъибтира, Мях1яммад дявила майдайчи укьес валилзан).

Тухтурти. Мях1яммад Расулович, х1у чина илцад гьалаксири?
Мях1яммад. Дергъла майдайчи.
Тухтурти. Т1ашизи, х1у ишав, госпитальлизив г1яг1нилири.
Мях1яммад. Х1ушани илдас кумекбарая. Дергъла майдайчибти бяхъибти бургъантаск1ун гьалакси кумек г1яг1нили саби.
Тухтурти. Иличила нушанира балулра. Амма илдас кумекбарес бек1х1ейубли левай, х1ук1ун душмантани каршури. Т1ашизи!
Мях1яммад. Вай-гьуя! Х1ушани халкьани-ургарти Женевская конвенцияличила селра х1ергъибсив? Медикуник1ун бургъанти ах1ен, илдани чула някъбази ярагъ кайсули ах1ен, чичилра бургъули ах1ен. Илбагьандан дургъбала низам-кьяйда х1ясибли, я медикуни, я журналистуни кабуршес асубируси ах1ен.
Тухтурти. Бургъахъес бархьаибти душманти конвенцияла х1укмуртачи х1ерх1ебик1ар: командирли хъарбарибси буйрухъ солдатунани таманиу.
Мях1яммад. Х1ушак1ун 21 ибил даршдуслизир х1ердирулрая. Ну кьяйда х1ушара дуч1ули калунрая. Конвенциябала х1укмуртик1ун халкьани-ургарти гьунибаънибачир кабулдарибти сари. Иличилак1ун х1ушани г1ях1ил балуси саби. Къаршикартасра илди х1укмурти г1ях1ил яништи сари.
Тухтурти. Илдани гьат1ира г1ях1ил балуси саби, душмантала юлдашунира чула душманти биъни. Илбагьандан къаршикартани чисалра урк1ец1и х1ебиру.
Мях1яммад. Дявила майдайчибти бяхъибти берцахъес дукьес урухк1ух1ели саррая х1уша илкьяйда дик1ути.
Тухтурти. Х1у урухх1ек1уду?
Мях1яммад. Х1ек1ус!
Тухтурти. Марли вик1улрив?
Мях1яммад. Нуни къяна бурули, х1ушани чебаибсив? (Мях1яммад г1ясивирар. Ц1уба халатчевли, някълизи х1унт1ена крестличилси ц1уба байрахъра касили, тухтур госпитальлизивад дураулхъан).
Волонтёрти. Мях1яммад Расулович, чарии, х1ярх1убани х1ед ламус х1ебиру!
Тухтурти. Госпитальлизибти бяхъибтасра кумек г1яг1нили сабину, чарии!
Мях1яммад. Ва дила балликьянаби, госпитальлизибти бяхъибтас кумек г1еббаахъес х1уша леррая. Дявила майдайчибти бяхъибти бургъанти сегъуналра кумек агарли батурли, ну ишав секьяйда калиша?
Гьари, дила узи Х1яйдар, каса носилкабира, ваши набчил варх.
Х1яйдар. Бусяг1ят! Бусяг1ят!

(Жагьил тухтуртани г1ур я юлдашунала, я волонтёртала т1ама х1ебикьу, ц1уба явлухъуни ахъдуцили, гьалабях1 аркьян. Лебилра госпитальлизибтала кьаркьлумази буг1ярси зим бух1набулхъан).

Тухтурти. Царх1илти берцахъес багьандан чула жан ах1ерх1едирулигу ихди жагьил тухтуртани. Я Аллагь, берцахъа илди!

(Гьачамличир-гьачам дахъдик1ути снарядунала к1ухлира, х1урх1бала т1амалира госпитальлизибтала урк1би кахдирахъу).

5 АНЦ1БУКЬ

Анзират. Мях1яммад, х1ела неш ребк1, х1ук1ун чедибдешличил чарулхъас вик1усисри!  Ва дила г1язиз урши, х1ела нешла чарх пашдехъ, х1ук1ун ну ара-сагъли чарирус вик1усири. Ва нешла г1язиз урши, х1ела жаназаличи ах1енригу ну х1ерси. Бурагу, гьанна, г1язиз, ну чизи гъайрик1иша, чичи ну к1ап1рикиша?

(Алав цалабикибти халкь бисур. Анзират х1яршрирули, ил х1ерисахъес тиладибик1ар)

Цалабикибти халкь. Сабурбара, ах1ерси Анзират. Г1ур иш бебк1а хъумартеси селра чемабуркъаб или рулген!
Анзират. Ва дила къугъа урши, х1ела нешла х1улби дац1, х1ук1ун: «Жявли мекъ бирис, х1у разирирахъури» или арякьунсири. Ну ишгъуна «мекъличи» ах1енригу рахъ х1ерси. Ва дила духул урши, х1ела нешла х1улби дац1, х1ед барибси юртлизи, бурагу, чи катиша?
Цалабикибти халкь. Ях1бара, Анзират, Ват1ан багьандан алхунти бубк1ути ах1ен: илди халкьла урк1базиб кавлути саби.
Анзират. Ва дила ах1ер урши, х1ела нешла хамха дац1, х1ук1ун: «Нугъунти дурх1ни алк1ан» или хьулсири. Бурагу чила дурх1ни гьанна лявкабариша? Илдас харжх1едарибти диги чичил дут1иша?
Цалабикибти халкь. Рахъ кьакьамарик1удгу, ва Анзират, фронтлизивси х1ела к1иибил урши ара-сагъли калахъес рулген!
Анзират. Нешла ребк1ла залум урши, х1у набчи чарухъахъес, бурагу, се бариша? Дургъби тамандиахъес, севан балга бариша?

(Алав цалабикибти халкь Анзиратличи к1ап1бикили, маслиг1ятбик1ар)

Анзират.  Мях1яммад, х1ела неш ребк1, секьяйда х1ерисиша? Х1у агар ванзаличир секьяйда х1еррииша? Мях1яммад, х1ела неш алх, секьяйда лех1кахъиша, х1у агарси юртлизир севан г1ямру дерк1иша?
Цалабикибти халкь. Гьигьбатигу, Анзират, гъабзадешли алхунти миц1ирли кавлутину.
Разият.
ВатIан цIализибхIели,
Ламилизир дерцIибти,
АхIер ванза берцахъес
ГIямру кьурбандарибти.

Чинаррая, гIяхIгъубзни,
Шантачи чархIевхъунти,
ХIушачи хIерли гъамти
Бухънакабаахъибти?

Чинаррая, дигайла
Нурли шадхIедарибти,
ТалихIла унза абхьес
КьадарбиъхIебиубти?

Чинарра, чедибдешла
БархIи чехIебаибти,
ЧеакIуб наслубала
ХIурматла гъай хIергъути?

Неш-ватIан балтахъули,
Жан дедибти гIяхIгъубзни,
ГIямру кьяйда наслура
Беткайхъуру хIушала?

МицIирта гьадурцалли,
Наградабас михъирти –
ХIушани гьадуцира,
ГIейкIули хIярхIбас гьунби…

ЧехIебаира талихI
ГIямрулизиб хIушани –
Шагьидли дебкIни сабри
Игъбар хIушаб баибси.

Анзират.

ДягIли бячун жярлаван
Жагь гIямру къябдердибти,
Жагьти хъабирухIели,
ХIябри кьадардиубти.

Дигайли хIедагьурти,
КарцIайли хIеделкъунти,
БиштIати кабалтули,
Кьукьуби хIеделкунти.

ГIяхIра вайра буртIули,
ХIяндиэс хIебикибти,
Жагьтала къушум-ургар
Шинна кIантIван дегъубти.

Айкьурти бегIтас гьалаб
КьацIла пай аберхурти,
Бахъ бигути гъамтала
БукIри хIяндиахъубти.

ГIямруличи милигли
Шалал дунъя батурти,
ЦIелдубазирад гьуйчи
ХIяйранни хIердикIути.

Шаладараб хIушала
Нурли цIудара хIябри,
ХIушачилацун ахIи
ЦIуммабухъаб гIур гъамти!

(Алав цалабикибти халкь Анзиратличи ва Разиятличи к1ап1биркур).

Зикру бируси дубурлан. Ва дила рузби Анзиратра, Разиятра, тилади саби сабурбарая: х1ушала уршбала уми я Ват1ай, я халкьли хъумх1ерту. Х1ябри нурли диц1аб чулану!
Халкь. Амин, я Аллагь!
Зикру бируси дубурлан. Илдала суратуни мармар къаркъубазирра историялизирра кавлан. Чула уми дигиличил ва пахруличил гьандуршес, х1ушаб арадеш биахъаб! 
Халкь. Амин, я Аллагь!
Зикру бируси дубурлан. Азирнали гьалабри, илди миц1ирли, х1ушала мякьлаб калунти биалри, х1ушала урк1би разидирахъес кьадарбиубли биалри. Илдас Аллагьла бек1унси кьадар илгъуна бииши. Нуша дисули хьалли, селра барес х1едирех1е. Я Аллагь, алжанализиб белх1еб саби!
Халкь. Амин, я Аллагь!
Зикру бируси дубурлан. Рузби Анзиратра, Разиятра, х1ушала урк1бази паргъатдешра хьурабиахъаб, гьанагар дец1 чекасес чархлизи кьуват керт1аб!
Халкь. Амин, я Аллагь!
Зикру бируси дубурлан. Дургъбира тамандиаб, лебил г1яламла дурх1ни ара-сагъли чарбухъаб! Хъулибти шадли баргаб!
Халкь. Амин, я Аллагь!
Зикру бируси дубурлан. Г1ур дургъби х1едиэсли, адамти баришбиаб! Гъамти ц1умх1ебухъесли, даршудеш имц1абиаб
Халкь. Амин, я Аллагь!
Зикру бируси дубурлан. Тухум-агьлула урк1би г1ямрулис ц1уммадухъаб! Уршби бетахъибтала урк1бази сабур бедаб!
Халкь. Амин, я Аллагь!
Зикру бируси дубурлан. Дургъбазиб алхунтала х1ябрира нурли диц1аб!
Анзират.

Дунъяла гIялам халкьли
Паргъат гьанк1 ихъухIели,
Рулгулра, шаласи бац
Бикьриван улкухIели:

Душма биштIатанира
ЦIуръадеш дагьмадагьаб!
ЦIуръали акIубтасра
ТалихIла пай гIеббааб!

Адамти-ургаб цадеш
Манзилли гьарзабараб!
Шурми кьяйда чIумати
Гьалмагъдеш гьарзадикIаб!

КъавгъахIели, маслигIят
Бируси сай цунмавхъаб!
Даршути шадбирести
АнцIбукьуни дахъдикIаб!

(Пардав)