(Анамы, Ёзденланы Патиматны дерслеринден)
Кюн Тейриси, тие келгин,
Джылыуунгу ие келгин,
Джазны аллын ача келгин,
Къыш булутну чача келгин,
Джаз башыны аллын ачхын,
Къуатынгы джерге чачхын,
Джылыуунгу джетдириучю,
Сабан ишни этдириучю,
Джарыгъынгы бери ийгин,
Джер – джюзюне тие – тийгин,
Ёсюм бериб ёсдюрюучю,
Ёсдюрюб а джетдириучю,
Булут ийгин мылысындан,
Джауум ийгин, джылысындан,
Джылы – джылы тама турсун,
Джер – ана да къана турсун,
Къана – къана тояр болсун,
Джайгъын чагъын джаяр болсун,
Кюнтаягъынг эндирилсин,
Джерге нюрюнг эмдирилсин,
Нюр эмиб а нюрлю болсун,
Битимлери тюрлю болсун,
Кёгет берсин бишгенинден,
Мюрзеу берсин джетгенинден,
Табыннгычынг – табынныкъда,
Тилегибиз – салынныкъда,
Салынныкъдан уча кетсин,
Тогъуз кёкню ача кетсин,
Санга джетсин тилегибиз,
Къуандырсын келирибиз.
Кюн - Тейри
© Copyright: Софи Трам-Семен 2, 2026
Свидетельство о публикации №226020101844
Свидетельство о публикации №226020101844
Рецензии