Неделя 4-я великого поста. О. Иоанна Лествичника

Тропарь преподобного Иоанна Лествичника

Пустынный житель и в телеси Ангел/ и чудотворец явился еси, богоносе отче наш Иоанне,/ постом, бдением, молитвою Небесная дарования приим,/ исцеляеши недужныя и души верою притекающих ти./ Слава Давшему ти крепость,/ слава Венчавшему тя,// слава Действующему тобою всем исцеления.

***

Тропарь преподобного Иоанна Лествичника, игумена Синайского

Слез твоих теченьми пустыни безплодное возделал еси,/ и иже из глубины воздыханьми во сто трудов уплодоносил еси,/ и был еси светильник вселенней,/ сияя чудесы, Иоанне, отче наш,/ моли Христа Бога спастися душам нашим.

***

Иной тропарь преподобного Иоанна Лествичника, игумена Синайского

Яко Божественную лествицу, обретохом, Иоанне преподобне,/ твоя Божественныя добродетели,/ к Небеси возводящия ны:/ добродетелей бо ты был еси воображение./ Тем моли Христа Бога, да спасет души наша.

***

Кондак преподобного Иоанна Лествичника

На высоте Господь воздержания истинна тя положи,/ якоже звезду нелестную, световодящую концы,// наставниче Иоанне, отче наш.

***

Кондак преподобного Иоанна Лествичника, игумена Синайского

Плоды присноцветущия,/от твоей книги принося учения, премудре,/ услаждавши сердца, сим с трезвением внемлющих, блаженне:/ лествица бо есть, души возводящая от земли к Небесней и пребывающей славе/ верою чтущих тя.

***

Иной кондак преподобного Иоанна Лествичника, игумена Синайского
глас 4
На высоте Господь воздержания истинна тя положи,/ якоже звезду нелестную, световодящую концы,/ наставниче Иоанне, отче наш.