Дунъяла бек1 левси сай

Арбякьунси даршдусла 80 ибти дусмазиб хьунул адамтала гъез дерхьахъес хасбарибси рурхьери лебсири «Махагоновый» бикIули. Илала чебхьла тIуйчил гъяжбаралри рурхьериличил барх хьамхьа дурабулхъусири. Иличил гьамадли ва жагали гъез дерхьес вирусири. Илини экологияличи асарбирни, ахъдешличибси гьавалара, илала чедибси бацIдешлара ургабси озонна къатлис заралбирни кабизахъурли, рухьери дуракаахъес лебил дунъяличиб къадагъабарибсири.


СССР лебхIели дунъяла тIабигIят ахIерабирусири, адамтала бекIлидиубти ихтиюрти далтахъути хIукмурти дунъяличир дузутири. Гьанна бусягIят дунъя палакатбирути дургъбани тIабигIятлис бируси зарал итхIелила гъезла рухьериличил цугбуцибхIели тамашарирулра. СецадхIи бирара нушала дурхъаси Ванзали давлаличи гъаргъти капиталистунала зулмукардеш чекасес. ЦIалара, гавлара дягIути гьундури детарахъули гьаваличир урцути ракетаби мерсдакьунхIеливан ванза гардбирули, даргудули сари, даргудути тупала гIярадабани ванза убил-чебирули саби. ЦIали игути набтла буругъунани цIябси дирихьлизиван цIяб-цIудара гавлизи дунъя гIелабиркахъули саби. Урхьулизир цIали игути набтли дицIибти гамурбани, цIудара набтли ва газли дунъяла урхьни нясдешлизи гIеладуршули сари. Дургъбазиб дурхIни кабушибти нешанала дигIянати цIумли, тIама агарли дунъя бучIахъули саби.
Чина аркьяна нушала хъалили сабси Ванзаличи бяхIчиаибси, сегъуналра дазура, къадагъара агарси зулмукардеш?


Ну пикририкIуливан, дунъяличиб селра, чиналра бетихъуси ахIен. Сунечила сегъуналра ташмишдеш агарли, гIялимтани кабизахъурли: «Закон сохранения энергии» лебси саби. Школала химияла, физикала дурсрачиб лебтанилра ил закон руркъуси саби. УрухкIулра, дургъбазир адамтани ванзалис дирути зулмурти, Ванзали адамтачи чардалта или. Дунъяла тарихлизир, дурхъаси Кьуръайзир лер мисалти, бунагькарти, зулмукарти, чули дарибтачирра жапати зулмуртачил дунъяла къакъличибад пяхIли бетахъахъниличила бурути. Чисалра гьанмабикаб Ванза, тIабигIят мицIирси ахIен или. Ил мицIирси саби. «КьячIубар дабри чегьурли, уктемли ванзаличив къунзмайкIуд, ванза мицIирси саби, илис изиаруси саби», - чинабад касирал ил гIякьлу гьанбиркули ахIен, амма ил бархьси ва бузуси биъниличи рирхулра.

 
Къачагъуни, урхьначир гамурби гъарали лутIути гъармукаби (пиратуни), бахъал иманагарти зулмукарти дунъяла тарихлизиб лебтири. СССР-лизир акIубли халараибси ну, къачагъунира, гъармукабира, бегIла гIелабти вайбаркьуни - фашистунира СССР-ли къирбариб, гьаннала гIергъи дунъяла халкь духули хIербирар или пикририкIусири.
ХIера гьари, гьанна се бетаурлил? СССР бехъубли бетахъахъили саби. Капиталистуни, «дунъяла хIябдехIэсти дургъби» дехIдихьили, хъархIерагарти улкни гъарали, гуж-зулмуличил лутIниличи бетаили саби. Гьанна илдала цIакьлис гьалабизес бируси дунъяличиб я улка, я адам кали ахIен.


ООН-на агара гьунар, илаб бархьси хIукму кьабулбарахъес капиталистунани балтули ахIен, Китайлира селра балбурцули ахIен, Россияра, капиталистунала макрули адикьурти дургъбазибад дурабухъес бирули ахIен, бархьли буралли капиталистунани дурабухъахъес балтули ахIен.


Се барес гIягIнили гьатIи дунъяла халкьли? Илдигъунти пикруманикIун дунъяличибад уркIи булхъахъули кьалли.


Илдигъунти пикруми дугIаэс багьандан, дила дудешла гъай гьандиркахъули рирус.
Халкьлис пайдалати дахъал гIяхIдешуни сунезир лерси СССР-лизир Аллагьличи бирхауди ва бусурман дин къадагъадарибтири. ИтхIели Аллагь левси сай, левси ахIен, ибти жаланира дахъал дирутири. «Аллагь бикIулил илис, яра цархIил у лебал хI****ас, амма иш дунъяла ВегI левси сай. Дунъя бархьли бузахъуси, мусни-зубрала ВегIбекI левси сай», – вакIусири дила дудеш.


Гьайгьайрагу, дунъя бузахъуси мусни-зубрала ВегIбекI левси виъни хIекьдеш саби. Иш дунъяра бархьдешличиб бузули гьалабяхI башуси саби. Къачагъунала, хъямчибала, гъармукабала ахир сеналра хайриласили хIебирар. Чумра гъармука сунези хIярибихьили, Ванза гьаннара бузули лебал.


Илгъуна бирхаудиличил хIериалли ахIенси, цархIил бареси нуни балули ахIенра.