Шумриван церхьбиайчи балтули

Дурала улкназирти тяхIяр-кьяйда нушалайчирра ункътили диэс хIедирар или мурталра пикририкIусири.  Ну пикририкIни хIясибли, капиталистунани саби багьандан ахIенси, халкь багьандан селра гIяхIси хIебирниличи рирхусира. Илдигъунти, бузерила адамтас гьамадли ахIенти, капиталист улкназирти аги-кьяйда 90 ибти дусмазир дила хIулбанира чедаира.


Нушала улкара капиталист улкаличи мешуси бетаурли саби, амма ил гьанналис гьарли-марси капиталист улкали бетаурли ахIен. Бахъал духути адамтала пикри хIясибли, нушала улкализиб дугIрухъси, кабизалаагарси «дикий» капитализм бетаурли саби. Илгъуна аги барсбарес вирусира гьанналис дакIувиубли ахIен.


Дагъиста халкьла яшавличила гъайрикIасли, сецад-дигара далагардешуни гьаннара лерли диалра, бусягIят лебсигъуна халкьла яшавла къулайдеш Дагъиста тарихлизиб гьачамалра биубси ахIенри. Дила пикриличил бахъал адамти кьабулбиркур или гьанбиркули саби.


Халкьлис асес сецад-дигара масани, берк-берж лер,  машинабани шагьар бицIили саби, яшав кункбирахъути технологияби хъулрази кадихьили сари. Бахъал адамти жибарили, жагати мукъри дирули сари, мукъри дирути залани, дахъал лерли диалра, гьаланачи дуцили сари, лерилра-сера дицIили сари.


Бархьаначи буралли, гьанна нушачив гушси адам варгес гьамадли ахIен, лебилра кьацIли ва гIебкали белкъи саби.


Амма халкьла ургар зигаръала лерал, бархьдеш агниличила, рушбатчидеш дерхъили диъниличила, халкь багьандан бузахъес къуллукъла хIянчурбачи кабатурти хIякимти, чула яшавличила ахIи, халкьличила пикрихIебикIниличила, гIуррара дахъал цархIилтира.


Халкьла зигаръала дархьти сари, аги-кьяйда марлира илдигъунти сари.
Нуни ишбархIи ГъазимяхIяммад Юсуповла «ХIердикIехIе, хIер…» бикIуси повесть белчIи таманбарира. Повесть гьарли-марли таманбиубли ахIен, белкIлизир детаэс дирути анцIбукьуначила хIебурили, хIябал точкаличил повесть таманбарили сай. Повесть ишбархIира, сегъуналра къиян агарли, даимбарес вири. Гьаннала хIякимти-хъулкнала далдуцуни итхIеллайтачирра гьатIира вирххIеэсти, тамашадизести сари, амма илдачила бурес Гъ.Юсуповлагъуна пагьмура, гъирара даргес гьамадси хIянчи ахIен.


Нушаб, Гъ.Ж.Юсуповли повестьла ахирлизи кадатурти хIябал точкаличи хъаряхъили гьаладяхI хIердикIес саби калунси. Лерил секIал чула мераначи кадизайчи хIердикIес, сенахIенну заманали лерил секIал, якьинни чула мераначи кадалтули сари.


БегIлара ну рирхути адамтачилси ихтилатлизиб бурулра: «Гьаннала хъулкни-хIякимти дахъал дусмазиб билгIяхъули, букахъули балтули саби, гIур баргили камси багьана буцили туснакъбирули саби, илдала давлара кебисули саби. Кебасибси чина башулилра балуси, ахтардибируси агара. Тамашабирулра нуни илгъуна хIякьикьатличи».


«Илаб селра тамашаласи агара, - иб цали, - букIунани шумрира илкьяйдали хIердирути сари, гIур цIерхьбиубсигъуна буцили, белгьи букули бирар. Илкьяйда бирули саби билгIути хIякимтасра».


Марлира илгъуна пикри наб тамашала саби или гьанбикиб.
Нуша лерилра дарх «ХIердикIехIе, хIер…», дунъяла хIякьикьат чина бетиурал хIердикIехIе.


Иш дунъяличиб хIебиалра, ахиратлизибалра бархьдеш сеннира чедибиркуси биъниличира дирхехIе. Газета бучIантас, хIялалти адамтас арадешра, гIяхIдешра дулгулра.