Х1янчи г1яг1нисиван т1ашбаталли...

ХIянчиличи дурарулхъухIели нясдешунала пакет барх касира, бархIиахъайчи илди хъулир датес хIейгахъис.


Савли, бакIили машина, тIакьни дицIибти нясдешуни ардухилри, илди сагали хIедицIили лералри, амма тIакьни дицIесцад нясдешунала бекIни ванзаличирра лералри. Илабси суратличи хIеризурхIели хIери баайчи тIакьни сагали дирцIни, ванзаличирти бекIни гьатIира дахъдиъни чебаэслири. Нуни илаб пикри бяхIчиаира нясдешуни кадирхьуси ца халаси тIакьа бицIахъибти цIедеш кадирхьути пластикала халали ахIенти ящикуначи. Пластикала ящик гIяхIцадхIи бузахъес вируси, сунела багьа лебси (дила пикрили дургIелира хIебургар) гьар бархIи хIяжатбиркуси гIягIниахъала саби. Нушани биалли, гьачам тукейзи баили, илизирти цIедеш дицили гIергъи, сагали пайдалахIебарили, жярга-зекъ бетаахъурли лайбикIулра. Гьар бархIи шагьарлизир сецад лайдикIули илдигъунти тIакьни? Илди тIакьни нушала шагьар нясбирахъути жярга-зекъ детаурли сари. ИлдикIун жярга-зекъ ахIен, давла сари. Илдигъунти тяхIяр-кьяйда сари кардонна, кагъарла тIакьначилра. Сагали пайдаладаресли илди дурчули ахIен. Илдалара чула багьа лебси биалра.


Сецад лайдикIулра нушани ниъ, шинкIаси сапун картIути, гIурра цархIилтира пластикала халали ахIенти шишни. Илдира багьа лебти, сагали пайдаладарес вирути секIал сари. Илданира шагьарлизир жярга-зекъ имцIадирахъули сари. Гьанналис гIяхIцад дусми гьаларал, дебали арц мяхIкамдирули харжбикIути Германияла халкьли, палтар ицути, тIалхIяна ицути сапунти чула хъулирад хибти шишнази картIахъули сари, нушаниван гьар хIяжатбикибхIели, сагаси пластикала шиша исули ахIен.


Илкьяйда саби, лерилрара-сера экология ва чула кепек ахIерабирути улкназиб. Нуша биалли давлачерлира, сагати шишни диресра, лайдакIили жярга-зекъ детаурхIели, илди ибгесра нушала сурсатуни лер.


Сеналра дила уркIи хIебиур суряхIила шиша, яра банка лайбакIес, амма лайхIедакIили се бируси, илди исуси, сагали пайдаладируси мер лебхIебиалли.


УрчIемцIали ибти дусмала ахирлизиб гьанбиркур лимонадла дацIдиубти шишнала кIел ящиклис, дицIибти шишнала ца ящик лугули. Нушани гьаман илкьяйда хъярбала тIемси лимонад исутири. Гьанна биалли чилилра илкьяйда бирули ахIен.


Совет хIукуматла замана, шимазирти берк-бержла тукентазиб бацIбиубси шиша 12 кепеклис исусири, цIуба кьацIла буханкала багьа 25 кепек бирусири, ил багьандан шишни чилилра лайдикIути ахIенри, дицес тукейзи дихутири. Гьанна суряхIила шишнира нясдешуни детаурли сари.


Гьачам нушачи гъамсигъуна тукейзиб иличила гьанбушибхIели: «Чарбарибси шиша бирцили, гIягIнисиван умубаресичибра, сагаси шиша барес дургIели кабилзули саби», - бикIулри тукейзиб бузути хьунул адамти.


Или биэсра асубирар, амма жярга-зекъ дахъхIедарес багьандан биалра, шишни дучили, дацIахъили, сагали картIес гIягIнили кьалли. Экология ибси девкIун бацIси тIама ахIен. Дунъяла адамтачи тIабигIят ахIерабарес чебси саби. ЛайбакIибси суряхIила шиша, ванзаличиб даимлис кавлуси саби. Илкьяйда, лайдакIибти шишнани, тIакьнани нушала тIабигIятла бегIлара жагатигъунти мер-муса дицIили сари. Адамтани шишни, банкаби шадиб гьуни барили гIергъи, илар дархькадатурли арбашули саби.


Адамтачил хIянчи баралли, илди масъултазиб бузахъес адамти кабаталли, арц харжхIедарили, иличи ургIебли, хайри сархули адамти, бузахъули хIянчи тIашбатес вирар ил шайчиб, дила пикрили.


Нуни пикрибариливан, гьарил жярга-зекъ кадирхьуси мерличир пластикала, суряхIила шишнас, кардонна, пластикала ящикунас хасдарибти тIакьни кадихьес гIягIнибиркур. ЦархIилти жярга-зекъ ардихахъесван илди ардихахъесра, илди хIяжатси мерличи даахъесра, жавабкардеш дихути хIянчизарти кабатес чебиркур.

Халкьли суряхIила, пластикала шишнира, тIакьнира гIягIниси мерличи кахIедирхьу или гьанбикес асубирар, дила пикрили кадирхьу, багьла-багьлали бурсибирар. Нуша хIердируси мерличиб умудеш биахъес цархIил гьуни агара.


Россиялизирад Германиялизи гечриубси хьунул адамли, бегIлара халаси сархибдешван, илар сари нясдешуни чула мерличи кадирхьес бурсириъниличила бурули бакьибсири ва тамашариубсири.


Итар, тетрадьла кIапIри дуцахъибси мегьла биштIаси бутIа, лайдикIути кагъуртачил барх арбукьялли, халаси гIякIа чебирхьули саби. Ил чили лайбакIилил белгибаресра илдала имканти лер.

Нуша лерилра, умуси, баракат халаси, халкь разиси шагьарлизир ва улкализир хIердиубли дигулра.