Неш-къакъба

ЦацахIели нуцунра гIяярвашули вираси. Савлила ва бархIехъла шадибгьуниличи тяхIярли, жумягIла ухIнав кIина-хIяйна ши-алавти ургубаличи гIяярли дураулхъаси, хяличил яра ил агарли.
Колхозла хъуми анкIи-мухъили делгIухIели, ши-алавти мер-мусаличир дахъал дирутири гIярми ва къакъбуни. ИмцIалин илдачи вираси нуни гIяярбируси. ГIела гIебшнилизив шаладиркухIейс чедакIибти хъумачи ваадлири, баибсири: гIярми илар дугули дургади. БархIехъличил берхIи гIелабиркухIелира гIярми, пукьназирад дурадухъи, беркесигIир кьяйцIдулхъути сари. Янила заманара тяп ил тяхIярли. Илгъуна гIяярличиб хури агарлира гIямал бетарар. Амма, савли хIу кьаниубли гIярми дигIяндикибхIели, хури гIягIнити сари.
Гьачам гьала гIебшнила манзил, берхIи гIелабикайчи, Пиратра нура дила юртлис гъамси ургубализи гIярмагIир гIяяр дурадухъунра. Нуша Мисадула гIинизла чеди даибмад (лебси саби нушала ургубализиб илгъуна гIиниз), Пиратли гурдала къел дуциб ва, ил гьабяхъили, Зубанчила шила чеди дурабушиб. «Букьялли букьяб,-- викIулра набзи ну.-- Гьабяхъяб гурда сунес дигуцад, ну гIергъихIеркусра. Се бируси августличиб какьурси гурда? Нуни ил, гули жагабиубхIели, январьличиб яра февральличиб бургис. ГIяра биалли, хя агарлира дурайис. ЧIянкIли  кьутбала ургаб заманаличиб тупанг игьес валкьаэс гIягIнили саби».
  Набзи ну гъайикIули, ваира Султанбекла къадала (мер-мусала у саби илра) балуй шайчибси цакамси лагбяхI гIяйбиубси диркьличи. Цалис ца тяйдили дакIибти дахъал кьудбира лерти сари илар. Кьадализиб се вяшарбухъалра иргьис викIули, хIядурли буцира тупанг.
 Ил анцIбукьлис гIергъи вахъхIи Аллагьлизи улгули, илис баркалла викIули калунсири ну, кьадализиб вяшарла бакьибси замана тупанг хIейгьахънилис. ИтхIели илабад арцан пархбухъи дурабухъун, амма чиналра атхIерцурли, дуцIбухъи, мякьлабси кьадала уди дигIянбикиб.
Къакъба сабри ил. «Сен гьатIи илцадра сахъси арцан, адам чеваибхIелира урцхIерцуси? — пикривикIулра ну. — ИлкIун чараагарли  арцес гIягIнисири». ГIурра ахъбиуб ва цархIил кьадала уди дигIянбикиб. Илабад гIурра камси арцурли, нуни чебиуси гьаргси мерличи, бяхъибсила дарили, шайчи кабикиб. ДуцIухъунрагу – харчбизурли балуй шайчибяхI дуцIбухъун. АрцхIерцур – дуцIбухъун. Ахирра ну шакикира къакъбала уюнтачи: ну илини балуй шайчи гьарахъихIи арикулри.
«ВяхI! ХIязта биркьулигу иш набчил» викIули, чарухъунра ит цаибси мизигъарла кьадала мякьла. Кьадалиу хIулби хIердизурга: арца биштIаси пукьализир, цаличи ца цIапIакунтиван гугдиили, вецIличир имцIа бара гъезли дакIибти, руржути мицIир жан. Ва хIела пякьир! Сунела дурхIни чехIедаахъес багьандан, арикули уилрагу ну къакъбали цархIил шайчи. Цагъунти буилигу лебилра нешани.
«ДяргIилину хIела дурхIни, чарбухъен, къакъба!» или вявъили, хя чарбухъайчи къалабаикили, ватихьира хъули.