Даимлис хъумх1ертурли кавлан

Гьарун МяхIяммадович Кьурбанов нушачил варх агарли гьанна I5 дус диркули сари.
Ил алкIукад дунъя сунечи мяштIбиахъес акIубсири, Дагъиста дубуртала дай уркIилизив, тарих хIясибли даршдусмала мурхьдешлизи арбякьунси шилизив. Илала хала дудеш Кьурбан-Кьади бусурман динна чебяхIси даражала багьуди касибси, машгьурси гIялим вирусири.


ХIядурбируси класс таманбарили гIергъи, цаибил класслизив учIахъес дудешли Гьарун Москвализи арукибсири. Илала багьудлуми хIясибдарибхIели, 5-ибил класслизив учIахъес кьабулварибсири. Илини I4 дус виубхIели белчIи школа таманбариб, гьаланачи Дагъиста мединститут, илала гIергъи ДГУ-ла тарихла факультетуни делчIун.


Очно МГУ-ла аспирантура ва докторантура хъараахъур, МГУ-лизиб философияла гIилмуртала докторла диссертация кабизахъур.

Илини урус мезван ункъли англияла мезра далутири, гIярабла ва латин мезли лукIули, учIусири, дебали жагали суратикIусири, музыка дигахъусири, литература ва математика ункъли далутири, спортлизи ахъибсири, гьарил шайчивад гьалавяхI арякьунсири.


Лерилра илала сархибдешуназиб илала дудеш МяхIяммад Рабазановичла ва неш ПатIимат ХIяжиевнала пайра лебси саби. Илди кIелра гIяхIти педагогуни саби. Илдани Дагъистайсцун ахIи, лебил Россиялис багалавиубси урши халаваахъиб.
Ил нушала республикала дурхъаси, сунес багьа баахъес хIейруси, нушани ахIераварес хIедиубси дурхъадеш ва чебяхIдеш сайри.


Июльла 28-личив ил алхнила хабар, баргбердибси тупла тIамаличил Дубуртар Улкала шимазиб, шагьуртазиб тIинтIбиуб. Ил бархIи алавчарси дунъя хумарбиуб, илис гIеларад нушала гIянжи-къаркъа, вацIа-хIяри дисули дурги, амма ил гIямрулизи чарварес сеналра вирули ахIенри.


Ил халаси бетахъри, нушала Республикализиб гьаннара чебицIили ахIен, ил агарвиубси манзил уркIбухъунси Дагъистан гьаннара чебсаргъили ахIен.
Гьарун МяхIяммадович гьанналис 15 дус гьалавра, сунела саркъибти багьудлумачил гьалавяхI арякьири, гьанналла заманалис гьалав хIерирулри. Илини сунела багьудлуми ца гIядатла секIал сарливан, Дагъистайс къуллукъличи кадатурлири, сахаватли халкьлис дуртIулри.


Иличиб сегъуналра гIяйиб лебси ахIенри, илизибад чисалра урехи лебси ахIенри.
Ил гьаникалли, - сегъунти инсап агарти адамти сабрира иличи някъ ахъбуцибти, - или пикририкIули рирус, - марли илдала юртаначи, хъалибаргуначи чевяхIси Аллагьли балагь бархьхIеибу?   


Илини делкIунти жузи аргъес, гьанна лебти гIялимтала гIякьлу биули ахIен, илала багьудлумас, чевяхIси Аллагьли дедибти пагьмуртас, гьаннара лайикьси кьимат кабатурли ахIен.


Дунъя тIашбизагарли гьалабяхI арбашуси саби, алкIан бургар гIурра Дагъистайзиб гIяхIгъубзни, халаси багьудила бегIти, амма Гьарун МяхIяммадовичла зубари, Дагъиста заклизиб даимлис шалали ухули кавлан, илала шалати нурли чеалкIутас гIямрула гьуни шалабиру.


Сунечи хIеризурхIели ну вигахъабая викIусигъуна вирусири, дунъялис, гIяламлис шалали пиширхъусири.

Дагъистанлантала уркIбазиб илала шаласи, жагаси сипат даимлис хъумхIертурли кавлан.