Иван ва Марья

Урус мезлизир — имцIали дархли къаршидиркути сари ишди кIел у: Иван ва Марья. Нуни чебаибси саби «Иван да Марья» бикIуси дахъал сериябала бегI кино. Балас лебли биъни Иван да Марья бикIуси шоколадла рангла ва бизиси тIемла бегI помидортала сортра. Гьайгьайра, лебтанилра балуси саби Иван-да-Марья бикIуси жагаси вавара.
Дила биштIаси хабарлизиб ну чучила гъайикIути Иванра Марьяра бухъна адамти саби, мурулра илала хабчабра. Илди ЦIудара къаркъуби бикIуси шагьарла дублабси мерличиб хIербирути саби, ва дила хабарлизиб кIелра барх маршруткаличиб шагьарлизи аркьули саби. Дила макьалализиб нуни илдачила хабар набчил рарх рузуси хIянчизарли бурибси тяхIярли гьалабирхьулра.
— Ит гIебшнила савлира, гьар мурталраван, 69 ибил маршруткаличир, ну Редукторный поселоклизи хIянчила аркьулри. Ил бархIи дебали бугIярлири. Ванаси пальточерси ну маршруткала унзаличибад алгъай шайчибси цаибси сиденьеличи кариилри. Гьар унза гьаргбирухIели, набчи бяргIибси дягIра чейгулри. Биалра, наб машиналичи кабирутачи хIеррикIес дигахъисну, дила пикри аги гIеларти сиденьебачи аррукьес.
«Шериф» бикIуси супермаркетла мякьла сабаибхIели, маршрутка тIашаиб. ИтхIели илаб нушала маршруткаличи кабирути кIел адамцунри, ухъна ва рухъна. Илди гIяхIцадхIи калун машинала гьаргси унзала гьалаб. Цали итил машиналичи гьалав ацIахъес къайгъназиб.
— ХIязта хIеркьули, машиналичи ацIигу, Иван. ХIуни хIянчиличи аркьути адамти кьанбирахъулри, — рикIулри рухъна, мяхIкамли мурул гьалавяхI къужирули.
— ХIу гьалар арацIи, Марья. НукIун джентльмен сайра: хIейрус ну, хьунул адамла хIурмат хIебарили, илис гьалаухъи, машиналичи ацIес, — викIар ил, гIелавяхI ганз кайцIули.
— ГIяхIна, гIяхIна, «джентльмен», «джентльмен», — масхаралисван гIердирули мура гъай, рухъна маршруткаличи арацIиб (илдала гъайлизирад дагьурра нуни илдала умира).
 Цаибил къяйлизиб кабиибти кIел дурхIяли, бусягIят харчбизурли, кIелра бухъна чула мераначи кабатур ва саби гIеларти мераначи кабиэс арбякьун. Илкьяйдали бухънаби шоферла къакъла гIелабси цаибси къяйлизиб уббухъун.
 Илдира нура ца къяйлизи кадиилри, ва нуни илдала гьарилла, гъайцун ахIи, гьигьла тIама бархли бикьулри. Ухъна кайэс гьалаб рухънани илала сиденье някъли хIяршбариб ва гIур сарира мякьлабсиличи карииб. Илди мурул-хьунул, саби маршруткаличиб биъни хъумартурли, чула хъулибван ахъли гъайбикIулри.
 ХIера, хьунул мура хъябла бигьунси шарф балбирес рехIрихьиб. ИлхIели бара гьаргбиуб илала гъярцIа хъяб ва сурсла гIянд. ХIерризуррагу ну иличи ва урухриубра: наб гьанбикиб гъуцгъуна бугаси гIяндли ухънала назикси хъябла кам гъяриу или.
ГIур рухънани ухънала букIуси пальтола (демисезонное пальто) хъябличибад цаибси хъапIа беталгIун. ГIур цархIилти хъапIнира хIясибдариб.
— Гьаргли бати, Марья, — викIар ил, — футлярлизи уцес ну Чеховла Беликов ахIенрагу.
 — Секьяйда футлярлизи уцес рирусира хIу нуни? ХIела пальтола хъапIни сари нуни детулгIути, —жаваб чарбатур хьунуй.
— Ватаба ну, Марья. Наб гьигьикIес къиянбулхъулину, пальто гьаргли бати, — тиладибариб гIурра илини.
— Ватурлирину, мурхьли гьигьикIен, ва, гIягIниси мерличи диулрану, яхIбара.
«Детский мир» туке гьала даэс камси замана лебалли, рухънани ухънази 100 къурушла кагъар гьабуциб ва рикIар: «Буца. Мурул адамли бирар шоферлизи арц дедлугути. ХIугъуна «джентльменни» хьунул адамлизи арц дедлугахъути ахIен». ХIяйранриубли хIеррикIулри ну, лагьниван къумбикIути илдачи. «Илдигъунти бирути саби мурул-хьунул, цали итил гIеббурцути ва цалис итил илцадра цIакьли дигути. Хьунул адамкIун…, хIурулгIянтала ургарра хIерургар илгъуна мицIирси жан», — пикри бакIиб дила бекIлизи…
Ца нуцун ахIенри илдачи хIяйранриубси. Лебилра маршруткаличибти лехIирхъулри илдала гъайличи. Ца хьунул адамликIун сунечи телефоннизибад зянкъбикIутас бархли жаваб хIегиб. КIиибил къяйлизи кайибси гьести гIямрула дубурлан викIар: «Хьунул адамтани ихичибад гIибрат касес гIягIниси саби. Се рикIишира дила рухъна, ихди чебаалри?». Бухънабани дурути дакьибси шоферли, «нуни жумягI бархIи пенсионертазирад арц сайсути ахIен» викIули, ухънани гьадатурти арц сахIесиб. Маршрутка «Детский мир» туке гьала баили, илди убяхIихъухIели, нуша лерилра айзурра… Муруйчир сари гьалар уряхIяхъибси хьунул адамли, «Биха иша!» рикIули вяврухъи, маршруткаличивад увяхIихъуси мура някълабси 100 къуруш хъямбариб. Ил анцIбукь гIячихъли чебаибси дубурланнара дилара мухIлиларад «Гьуя! Се бирули ихини?!» или тIамри дурадикиб.