ПатIиматла суточныйти диули ахIен

Ишди бурхIназиб Умахан ГIяндийскийли (Ил кIарахъала мезличиб дурабулхъуси «ХIякьикьат» газетала бекI редактор сай) набзи Расул ХIямзатовла гIямрулизибад ца биштIаси масхарала хабар буриб. Ил хабар илини бурибси тяхIярли бучIантас гьалабирхьулра, сенкIун, балуси саби нушани, буруси секIал дукелцIидухъесли сипатбирнила устадешличил ЧевяхIсини гIяндантиван бегIбарибти цархIилти чилра агарти саби.
- Нуни буруси биштIаси анцIбукь кабикибсири 1998 ибси дуслизиб. Ну илхIели «ХIякьикьат» газетала бекI редакторла заместительли узусири. Поэтуни-писательтала ва журналистунала ургаб дила бахъал юлдашуни бирутири. БегIлара гъамти юлдашуназивад ца сайри писатель, драматург ва журналист ГъазимяхIяммад ГъалбацIов. Нушала цаличи цала дахъал мешути лишантира хасиятунира лерри, ва нуша  зилантира сарри. ИмцIаливан ил багьандан дурги нуша мурталра дарх дирутира. Наб дебали декIси анцIбукьли биуб итцадра жявли ГъазимяхIяммад  гIямрулизивад арукьни. Набцунрив гьатIи? ГъазимяхIяммад ГъалбацIовла бебкIа Дагъиста литературализиб чебицIес хIейруси бетахъри сабри.
- Ил набра гьаниркур: РГВК-лизив узухIели, кIарахъала мезли дузахъути передачабала редактор вирусири, - чебатурра нунира илини бурусиличи.
- ГIе, гIе. ГIямруличи гъирачевси, мурталра разиси адам вирусири ил. ДекIли зягIипхIелира кьакьахIейкIи, урхIлизи сай изули виъни хIебагьахъес къайгъилизив вири. Гъалбацовли сайри ну Расул ХIямзатовличил тянишварибсира.
ХIези буруси анцIбукь, нуни заманалис «ХIякьикьат» газетала бекI редакторла хIянчи дузахъуси замана бетаурсири.
Ца бархIи Расул ХIямзатовли набчи хIянчила зянкъдяхъиб ва викIар: «ИшбархIи нуша тIабигIятличи шадир аркьутирану, дуравхъен». Нуни балусири секьяйда Расул ХIямзатов юлдашуначил варх тIабигIятличи шадив вашусил. ИтхIели нунира чягъирла ва пивола камси бужули вираси. Валкьаурра нура тIабигIятличиб  шадибгьуни барес укьес.
ХIябал машиналичи кадиили, вецIалцада адам дурадухъес хIядурдиубхIели, Расул ХIямзатовличи «чедирад» зянкъхIедяхъесу. Камси заманали нуша лерихIи чарухъунси Расул викIар: «ИшбархIи тIабигIятличи архIя бетарули ахIенну, къалабали даширая  «Лезгинкализи». Ресторанна гIела шайчирти унзализирад духIна айцIухIели, Расулли сунес гьала дуцIрухъунси официанткази ишди дугьби дурибтири: «Нуша дахъхIи кадиэс замана агарану, къалабали бяргIибси закускара имцIа-имцIали бержесира биха».
Дужули, дукули ва лякьирдикIули, сягIятцадхIи калунра. Официанткани Расул ХIямзатовла гьала счет кабихьиб…
Ну поэтличи хIерикIулри. ВяхIлизивад варсиуб счет белчIунси Расул. Някъбани суркдариб ляжуби, къянкъличирад черасиб ва гIурра ила даршиб гIячкиби. ЛихIила чедибад тIулбани суркбариб бекI. «Се бетаурли итис? Сен ил варсиубси?» - хьарикIулра ГъазимяхIяммадлизи.  «Расулла счет хIясибли дедес арц хIедиули дургар?» – викIар юлдаш ва ахъбуциб пигьала. Илди дугьбачи тамашавиубси дила някъбазибад пиволи бицIибси стакан кабиркули хIилхIири. «Арц хIедиэс дирутив чевяхIси Расулла?» - викIулри набзи ну. «ПатIиматла суточныйти диули ахIен», - гIур аргъира Расулли сунези сунени гIяшли дурибти дугьбира (верхIцIану шура дус виубси муруйзи камли держла бужахъес багьандан,  ПатIиматли Расулла кисназир дахъал арц хIедалтули рурги. Илди арцлис Расул ХIямзатов масхаралисван «суточные» викIули уили сай).
«Дила лер арц, - викIулра ГъазимяхIяммадлизи. – Хьарбаа сецад гIягIнилил». Даршлим урегцIали къуруш дуилри камти. Сунела гехIдаршличи дила арцра чедирхьухIели, нуни дакьира илини Гъалбацовлизи дурибти ишди дугьбира: «ИшбархIи ну ГIяндийскийли цIахдешлизивад верцахъира». Ит бархIиличивад вехIихьили, Гъалбацовван, нура Расул ХIямзатовли гьалав чейусили (любимчик) ветаурсири.