СецадхIи нуша пескарьтани кавлутира?

   ИшбархIила манзиллизиб адамдешла баркьудлумачи бегIлара цугхIебикеси секIал се сабил балулраяв хIушани?.. Белики хIушазибад бахъалгъунти ил анцIбукьличила гьачамлис пикрихIебухъи биэсра асубирарну, гьари иличила дила пикри бурисра.
   Нушазиб гьалаб хIебируси, амма гьанна лебси ва бегIлара убяхIси секIал нуша адамти имцIали бубкIниличи  бурсикадиъни саби. Нушани шагьилизи дирули ахIенра «коронавируслизивад адам вебкIили сай» ибти гъай. Чараагарли ил тяхIярличиб биэс гIягIниси секIайчиван лехIихъулра нуша илди гъайличи (Арбякьунси дусла гIеларти бурхIназиб нушала улкализиб ца  бархIила бухIнаб коронавируслизибад бубкIути адамтала лугIи урегдаршличи  абиркIули бири).
   Нуни бакьибси саби ца ишгъуна секIалра: цацадехI шагьуртала морглизирад бебкIибтала жаназаби хIяридихьес архIедихули сари бикIути гьай.
   Халаси цIахдеш ахIену гьатIи ил? Дявтала заманализибра бархли душмантани цабехIли итдилти дергълизиб алхунти бургъанти хIярибихьахъес балтутири. Похоронная командаби лертири. Илди дергъ кабикибси мерличи дашутири, ва гьарилли чула алхунти хIярибирхьутири.
   Ишаб цагьатIи секIал хIебурес хIейрус: ил нуни бусягIятла нушала гIямрулизибад касибси саби. Коронавируслизибад бебкIибти хIярибирхьухIели, вебкIибсила бегIлара гъамти адамти (узи, урши, дудеш) хIябрази  хIебашниличила саби наб бурес дигуси. Илди зягIипли бакIес хIебирули биалли, дила гъай агара. Рахли, сегъуналра зягIипдеш агаркъи, чейхъуси изайзибадси урехили хъули дигIянбикили биалли, нуни хI****асра ил анцIбукьлис се викIусил…
   Чебиулрав, секьяйда деткайхъахъулил нушала адамдеш ил  буркьа изай? ГIе, илди коронавирусличил дархдасунти ва гьалар нушазир агарти лишанти дакIудулхънилизивадра ну урухкIуси. Баласра (или бурули бири цацабехIти ВатIа ЧебяхIси дергълизибад чарбухъунтани): чула валуси дявилизив кавшалри, ил левигIи учибикили, децI бирниличибли,  бахъал цархIилти нушала дубурлантира душма хIярхIубауб улхутири.  Дявила цIализивра вебкIибси хIярихIейхьили валтули хIейри, бикIар, илдани. Гьари пикридухъеная, итхIейчирад ца даршалалра дус дикили ахIен, сецадла вайна шайчи барсбиублив адамти. Или биалли, дирутирав нуша адамти сарра дикIес?
   Дилара имцIатигъунти дурхIни ва дурхIнала дурхIни коронавирусла изайзи бикиб.Гьалавван зягIипикиб дила хIябэсил уршира.
   ГIямар Ставропольла крайлизив хIерируси сай. ЗягIипикибси иличи зянкъдикIули, багьурра нушани илала кьаркьа ванадеш (температура)  ахъбирули биъниличила ва илизи, дархьдатурли лерилра дирути, къалабали МяхIячкъалализи вакIахъес хъарбарира. Ил нушачи лехIизур ва, бархIехъ сунела машиналичи айили, дай дуги дикибхIейс Ставропольлизивад нушала шагьарлизи ваиб. Халал узичиб дуги беркIили, савли МяхIячкъалала цаибси больницализи кайхьун. ВецIну кIира бархIи илав кали, зягIипдешлизивад аравиубли, сай хIерируси мерличи арякьун.
   УркIи-уркIилабад халаси баркала балахъулра Ставропольлизивад вакIибси дила урши бусягIят больницализи кайхьахъес кумекбарибси шагьарла цаибил больницализив  вахъхIи узуси уркухъан тухтур Басир Будаевич Халитовлис, ГIямарлис чебетаахъили кумек гIеббаахъибси илар рузуси дибгашан тухтур Халисат ГIяммациевас ва лебилра ил больницала хIянчизартас. ЧевяхIсини хIуша гIямрулизир гьар секIайзир гIердуцаба, дила ахIерти!
   Больницализи кайхьес гьалав урши нушала азбарлизи дакIуухъун, амма илини нуша кIиибил дерхIличирад сунечи кадацIахъес хIедатурра. Машина нушала азбарлаб батурли, ил, сайцун арякьи, больницализи кайхьун. Больницализив аракайубси, ил гIурра дакIуухъун нушала улкьайла удив. Нушачи хьурахIейуб ва, кайили машиналичи, сай хIерируси мерличи арякьун. КIелра анцIбукьлизир нуша, бегIти, кIиибил дерхIличибси улкьайларад азбарлавси уршиличил гъайдикIутири.
   Нушани балулра, урши нушачи гъамхIейубси нуша зягIипхIедикахъес багьандан виъни. Халаси баркалла сунес. Амма… Нуша? Нуша селис гъамхIедиубтири, больницализи кайхьи, аракайубси уршиличи? ИтхIели уршила някъ буцес азбарла дурахIевхъни багьандан, гьаннара левалра набчи ну гIяйибта виркьули. ГехIъибил вецIлихъ бибгIянбарибси наб се дирутив илдигъунти урехила гIямру? Се саби иш пана дунъяличиб нуни чехIебаибси?!
   Мартла ахирличивад вехIихьили, отпускличивси сентябрь базра хIянчила вашуси октябрьра халхIедарили, ну гехIъибил баз хъули кайилра. СецадхIи гIурра, хъули дигIяникили, кавлусира ну? Журналист узес вирусив, хъули кайили?
   Юх! Ну журналист ахIенрану, Салтыков-Щедринна бялихъра («Премудрый пескарь»). Ил бялихълара дилара иткъира лебли буили саби цалайчи цала мешудеш. Пескарьли цайна муэрлизиб сунела гьарбизла билет (выигрышный билет) 200 азир къурушличи цугбикили чебаилри. Тяп ил тяхIярли Сагаси дусла дуги нунира чебаира цаибил январьличиб набра миллион къурушличи сагаси дусла лотереяла билет цугбикили. Гьари гIяхIли пикридухъеная, белики хIушалара дургар ил пескарьличил мешудешуни.
   Гьанбиркуру хIушаб урусла чевяхIси писательла хабарлизибси «премудрый» пескарь? Илала гIямрула бекIлибиубси мурад биубцад бахъхIи иш дунъяличиб хIербиъни сабри. Ил багьандан ил «дебали духуси» биштIаси хIеркIла бялихъ, щукализи яра раклизи саби хIебергахъес багьандан, сунела пукьалабад дурахIебулхъули, 100-чибра имцIа дус мицIирли калунсири. Гьар бархIи савли чебаргъибмад, «Аллагьлизи шукру, мицIирли лебалра» бикIусири ил. Писательла цархIилти гъайли буралли, премудрый пескарь «урехили руржули хIербиуб, ва руржули бебкIиб» («жил – дрожал, и умирал – дрожал»).   ИшхIелла гIямрулизир нушара пескарьти дуилра