Сукникьянаби мурт бурхьехIе, неш?

Нушала республикализиб миллатла мезани детхIехъахъили калахънила суал бекIлидиубтазибад ца саби. Гьар миллатла халкь къайгъназиб саби чула мез ва культура хIердарес. Нушачир гьар дус байрумтиван дурадуркIути сари миллатла мезанала дунъяла халкьани-ургабси БархIи ва Дагъистанна мезанала ва культурала БархIи. Чула мез ва культура гьатIира гIяхIли дихIес ибси  пикрили, бургар, нушала адамтасра чула дурхIнани чула  миллатла адамтачил хъали-цIа цадарили дигутира.
Рарх рузуси Анжелани, сари муртрил маршруткаличир хъули чаррулхъухIели, ил суалла чебкад сунечил кабикибси анцIбукьличила хабар бурибсири. Наб тамашабизурхIели, хIурматла учIан, илини бурибси тяхIярли, хIедра  гьалабирхьулра.
- Гьачам уршира нура 45 ибил маршруткаличир Редукторный поселоклизи хъули чардулхъулри. Ца мерличиб маршруткаличи кIел къуймур рурси абацIиб. Нуша кадиибти сиденьебас гьаларти дацIти мераначи кабииб. Наб илди дебали жагабизурли бииши, ну илдачицун сарри хIеррикIуси. Чула куц хIясибли, кIелра рурси школала чедирти классуназиб бучIанти яра студенткаби бурги.
Дебали жагати рурсбири илди. Саби-ургаб ихтилатбикIес бехIбихьибхIели, нуни багьурра илди дила миллатла биънира. Тамашавиэсти, жагати нешла мезличил гъайбикIи илди исбагьиби! Ну иштяхIличил илдачи лехIризурлири. Нунира даласгу нешла мез, амма илди рурсбаниван…
Чинар дагьес рирусири нуни нешла мез илданиван гIяхIли? Дила дудеш гIярмияла офицер сайри, ва нуша мурталра дудешличил дарх ита-иша гечдирутири. Дахъал мераначи раибсира ну риштIали лералли. Дявила частани мерладирути диштIати шагьуртазир (военный городок) шалгIердухъунти сари дила дурхIядеш. Иларти школабазир сарри ну ручIуси. Илар ва солдатунала казармабазир Дагъиста миллатунала мезани руркъяхъули ахIенри.
Набчил нешла мезли гъайрикIуси ца нешцун рири, рах-рахли – дудешра.
Наб нешла мез дебали дигахъис. Нуни балуси тяхIярли дила дурхIнира илди мезличи бурсибирули рирус. Дила мурул цархIил миллатла адам сай. Илини нушала дурхIни сунела мезличи бурсибирули вирар. Балулра, гьамадли хIебирар нушала дурхIнас нушала мезани дяркъес… Гьари, дурхIни батурли, нушала гьала кабиибти рурсбачила гъайрикIусра.
Рурсбазирад цаличи телефоннизирад зянкъ дакIиб. Нуни бируси бархьси хIебиъни балукъира, телефоннизи илини дурутачира лехIяхъахъес ну уркIили гьуцIрарира. Рурсиличи дудешла узи уилри зянкъикIуси. Рурси сари «уртахъ рурсиличил рарх сарра» рикIар. «ИмтихIянтачи хIядуррикIес иличи аркьулра. БархIехълис хъули ляркьяс, адавзи», - тамандариб илини дурути.
Исбагьибачи лехIяхъибхIели, хабаралра агарли дила уркIилизи ца дигIянаси пикри абацIиб. Нуни ил хIебураслира, хабар бучIуси иличи шакиркурну, гIур бурес балтасра.
ИштяхIдухъеслири илди рурсбала ихтилатличи лехIирхъес. Ну «илдачи гIяшикьлири» ибтицун дугьбани, баласра,  итхIелла дила уркIила хIял хIергъахъу. Ну «тамай талихIчерлири» рикIасли, хIушани аргъес асубирар ну се хIяйчиррил. Нуйчибра талихIчебтили биэс гIягIнитири илцадра жагали чула нешла мезли гъайбикIути илди рурсбира. «Илцадра игъбарла дегIти жан дирутив?!» - рикIулри набзи ну, рурсбачи хIеррикIули.
Мякьла кайибси дила вецIну гехIра дус виубси уршира рурсбачи лехIяхъилри. «ГIяхIти рурсбигу ишди гьалабти, ваши, хьарбиэхIе се районна, се шила сабил, - гIяшли рикIулра уршилизи. – Илдазирад ца хIед леркехIе. ХIу илини, сариван жагали, нушала мезли гъайикIахъесра бурсиирури». Уршили жаваб чархI****ур.
Садаира маршрутка тIашиуси мерличи. Дурабухъес хIядурбиубти илди кIелра рурсилизибад цали, ахтудирухIеливан ахъли, хIейгеси тIамаличил «Ну что, выплевываемся?!» рикIули, урус мезли итиллизи хьархIебаэсу. Ну, буреси хI****ули, аъряхъили калунра. «Илдани хIедурги илди дугьби дурибти? – уркIрухъунра ну. – Чинар бурсириубсив ил илди дугьбачи?». Рурсили дурибти хIябал девли наб  дунъя цIударбариб. «Гьуя!»-рикIули, нуни дяхIличи някъби чедуцира. ИтхIейчибад барсбиуб жагьилтачила  дила пикри. «Гьарил лямцIбикIуси секIал мургьи буили ахIен, - ибси буралара гьанбикиб. – КъалабамарикIуд урхI кьиматлабирухIели».
Масхара бухIнабуцибти дигIяна дукелцIиличил (с иронией) набчи хIеризурли, уршили хьарбаиб: «Сукникьянаби мурт бурхьехIе, неш?»…. Гъану гехIра дус виубси ил гьаннара хъайчикахIейили левал.