Унзализи кьутIла тIама

Ишди бурхIназив ну хъулив, гьала кабихьили ноутбукра, «Дагестанская правда» газетализиб жумягI бархIи дурабулхъуси «Разиси гумай» бикIуси бяхIлис, масхарала биштIаси хабар белкIес пикриличил кайилри. ГIе, гIе, хIянчила бурхIни ну нушала газеталис дарган мезличил лукIусира, акьути бурхIни биалли - уркIила гьуцI хIясибли урус мезличил.
Бархьли бурасли, дила тамай акьути бурхIнира агара. Советский Союзла замана нугъунти лукIути адамтас жумягIла духIнарти хIянчила бурхIназибад ца творческий бархIи лугусири, бикIар. Гьай, гIяйиб-гьай! Сен ну итхIели хIелукIусири?...
Сут бархIи, кайили столла гIела, лукIулри. ИлхIели хабарра агарли кухнялизирад хьуна тIама иргъулра:
- КьутIбикIути тебну, унза абхьа!
- Ну хIянчилизи вархилрану, хIуни абхьа! - викIулра.
Камси замана дикили гIергъи, гIурра илала тIама:
- Ит хIечи вакIибси сайну, столла гIелавад дуравхъен.
Дархьдатурли лукIути, гьайбарира унзаличивяхI. Абхьибти унзала я ухIнав, я дурав агарли унабурхIличи тIашли, чейулра ургарти гIямрула цIудара муцIурла вегI мурул адам. Илала муцIур яра гьанна жагьилтани далтути муцIуртачи яра чи-биалра гъамси вебкIили марайдешлис далтутачи мешуси ахIенри. Нуни чедиути ца базалра мутIрус чучи гачхIебикибти держлукьла дяхIри.
КьяпIдарили унза, нуни ил дурав ватес гIягIнисири. Амма набчил гъайикIуси илини дила у бурибсиван бизур. БусягIят нуни бихуси у ахIенри ил. Ну гIяхIли валути тухумти ва бахъхIила юлдашуни набчи дугьабилзухIели, буруси дила у сабри (Ну, циила вайтIа дикьниличивли, ишав хатIавиркули виэсра асубирар).
Чи саял сунела дебали гъамси декIли зягIипикили, илис дармунтас арц учидяхъес дуравхъунсира викIар ил. Ну сунечи тамай вирхаахъес урги, нушала чедибси квартирализирра арц гиб викIар. Нушала чедир хIябэсил дерхIличир хIеррируси мурул вебкIибси хьунул сарри. Илала хIябал биштIатира лебри. «ВяхI! Ятим гамъа хьунуй ишис кумеклис арц дедили риалли, нуни гьатIира жявлил дедес гIягIнитири», - пикрибакIиб дила. Чариубли хъули, кисмази някъ батурра. Дила  кисализир лерти азир-азирла кагъурти сарри. Гьалав хIулбанилра чехIеибси адамлис азир къуруш дахъал дургар или наб гьанбикибну, цаялра шударш къурушла кагъар баргес или, гIуррара кисмази къяйцIухъунра. Агарли урдухъун.
- Деда ит гъабзас кIидарш къуруш! – вявбяхъира кухнялизирси хьунуйзи.
- ХIера-хIера! - дебали зигаррухъун хьунул ва набзи даршал къурушла кагъар гьабуциб. – ХIела гIяхIяйс ихдира диур.
Нуни арц уруз-хIяцIли дедира.
Арц камли дедили ургус ибси пикрили ну гьалавван  гьамадли лукIахъес валтули ахIенри.
- Ваши иша! ХIеризи кьакьала чебаэс, чис сарил хIуни арц дедибти! Илаб хIела гIяхIяйчи кIел гьатIи держлукь хIерли буилигу. Нуни или биъни балусири! – зайбухъунб кухнялизибад гIурра тIама. «Балули риадри, ну селис тIалабирусири, «хIечи вакIибси тев» рикIули»  --  жаваб чарбатес гIягIниси бурги нуни. Амма ну столла гIелавад шишхIевхъунра. Азбарлабти держлукьуначи хIеррикIуси хьуна дяхI гьанарули, нуни хапли чедакIибти дукелцIи тIашаэс хIейрулри. ДукелцIиличил барх дила уркIила хIялра гIяхIси шайчи барсбиуб. Иличибли нуни лукIусира гьамадли таманбарира. ЧIянкIли гьаннара балули ахIенра нуни, чили бурибсирил гIяхIяйзи дила бахъли хъумартурси у.