ГIурра хабардерхаб хIечила

ИшбархIи нуни сунечила макьала лукIуси адам дила юлдаш уркухъан ХIясбулла МяхIяммадович сай. МажахIят, бургар Дахадаевла районнизиб, бахъ жагьилти ва биштIати халхIебаралли, ил хIурматла гъабза хIевалути адамти.
ХIясбулла МяхIямадович МяхIямадов акIубси сай Уркарахъив 1939 ибил дусла февральла 25-личив. 1963 ибил дуслизиб илини Дагъистанна мединститут таманбариб ва, итхIейчивад вехIихьили, сунела районнизибси больницализив бекI тухтурли, цацахIели гIядатла хирургли узиб. Ургав ил хирургли узули калун МяхIячкъалала больницабазивра. Бахъал адамтала жан дерцахъиб ил пергер тухтурли. Дагъистаннизир устадешчевси хирургличила хабурти тIинтIдиуб. ЦархIилти районтазибадра операцияби дирахъес зягIипти иличи Уркарахъи башутири.
Ахъли кьиматлабарибси саби нушала хIукуматли чебяхIси категорияла хирург ХIясбулла МяхIяммадович МяхIяммадовла бузери. Ил лайикьикибси сай РФ-ла ва ДР-ла урибси тухтурла, ДР-ла халкьла тухтурла умачи. ХIясбулла МяхIяммадович СССР-ла арадеш бихIнила отличникра, «Мургьила скальпель» премияла лауреатра, «ХIурматла лишан» орденна кавалерра сай. 2015 ибил дуслизив ил Россияла медицинала бекIлибиубси премияла лауреат ветаурсири. Гьари ил анцIбукьличила нуни циила тIинтIли бурисра.
2015 ибил дусла июньна 21-личир, Россияла медицинала хIянчизартала БархIи, набчи телефоннизирад зянкъдяхъиб. «ИшбархIи бархIехъ, - викIар зянкъикIуси, - Россияла телевидениела цаибил каналлизиб РФ-ла медицинала бекIлибиубси премия бедлугнила балбуц чебиахъуси саби. Илаб хIела юлдаш дагъистанлан тухтурлисра премия бедлугусину, телевизорла гьала кайэс хъуммартид».
Ну ил бархIи бархIехъ телевизорличи хIерикIулра. Нушала улкала гIяхIтигъунти тухтуртас Россияла медицинала бегIлара бурибси «Призвание» бикIуси премия бедлугнила балбуц чебиахъулри. Балбуц бузахъулри медицинала гIилмуртала доктор, профессор, «Арадеш» ва «Арали хIерирес» бикIути 1-ибил каналла программабас бекIдеш дируси Елена Малышевани ва Россияла халкьла гIяртист, «Къалабаси кумекла» тухтур Александр Розембаумли.
«СанигIятлис мардеш багьандан» номинация хIясибли, медицинала бекIлибиубси премияличи лайикьикилри Дагъистаннизивадси хирург ХIясбулла МяхIяммадович МяхIяммадов. РФ-ла арадеш бихIнила министр Вероника Скворцовани ХIясбулла МяхIяммадовичлис премия бедлугухIели, тамашали бузескабииб дила уркIи. Ил делхъли улхъес кавхъунхIели, вахъ разивиубдешли наб ил баргудар или гьанбикибсири.
Чедиб гьанбушибси анцIбукьличила дила макьала итди бурхIназиб «Молодежь Дагестана» газетализиб дурабухъунси саби. «Замана» газетализирра дурадухъун нуни юлдашличила делкIунти макьалаби. Иш яргалис нуни бучIутас гьаладирхьулра ХIясбулла МяхIяммадовичлара дилара гIямрулизир кадикибти анцIбукьуначила ца-чумал диштIати хабар.  Илдазирадти цацадехIти дила цаибси хабуртала жузлизи кадерхурти сари.
Халаси узи
ХIясбулла МяхIяммадович, гьар набчи дугьавилзухIели, «дила никIа юлдаш» викIусири. Ил набчив гьарли-марли гIяхIцадла халаси сай, ил багьандан бурги нуни «никIа» ибси девличи камли пикри бяхIчииуси. Иш дугьбала цахIнабиклизиб бекIлибиубси дев «юлдаш» саби. ХIясбулла МяхIяммадович набчи «юлдаш» или дугьавилзни наб дебали гIяхIбилзи, сенкIун ил ца девли ну валутала ургаб дила хIурмат ахъбирахъусири.
1980 ибти дусмазив дила шан ва гъамси юлдаш Ражаб МяхIяммадович нушала районнизив КПСС-ла райкомла цаибил секретарьли узес вехIихьибхIели, ХIясбулла МяхIямимадовичлара дилара гьалмагъдеш гьатIира цIакьдиуб. ИлхIейчирад дехIдихьили, районна больницала бекI тухтурра нура имцIали къаршидиркутири, мукърачир, сяхIбатуначир ва цархIилти шадлихъла далдуцуначир. ЦацахIели шадлихъла мявализив Ражаб МяхIяммадовичра нушачил вирусири. ИтхIели ну райкомла цаибил секретарьлара больницала бекI тухтурлара бархбас хIербируси рахажла мявали  вираси викIасра хатIахIеркус.
Лерилра дила ва дила хъалибаргла излуми сагъдируси тухтур ХIясбулла МяхIяммадович вирусири. «Дибгашанти дарг дурадикибхIелира бекI тухтурличицун саби дугьабилзути», - ибсири нуни валуси, нушала районна больницализив  узуси жагьил хирургли. Нуни аргъира, илди дугьби набчила ва дила тухумтачила диъни. Бархьси сабри илини буруси, излумала хIекьлизив ну имцIаливан ХIясбулла МяхIяммадовичличи сайри дугьаилзуси.
Гьачам ну шакалра хIейкили, дила дарг дурадикиб. Гьар хъехIъибхIели, канила удир, алгъай шайчир, демдри дакIудулхъесдииб. Илди дебали хIейгести демдри сарри. Дурадиркути дарг чизилра чехIедиахъули, дигIяндирули, ну гIяхIцадхIи калунра. Ца бархIи, ил анцIбукьличила ХIясбулла МяхIяммадовичлизи бурес кьасли, ну районна центрлизи ваира. Савли тухтуртачил бируси шел минутла ихтилат таманбиубхIели, бекI тухтурли ну сунела кабинетла гьалав варгира. Набчи ил дебали разивиуб ва, абхьили кабинетла унза, сунечи ацIахъира. Гьайгьайрагу, нуни илизи дила демдри чедаахъира. Тухтур демдриличи хIеризур, илди някъли хIясибдариб, гIур викIар: «БусягIят операция бирехIе».
«Диур наб дарибти операцияби, - викIулра ну. – НабкIун операцияличи хIядуриэс гIягIниси саби». «Юх, гIела арбухес цугхIебиркур, - викIар ХIясбулла МяхIяммадович. - Операциялис гIягIнити лерилра секIал хIела юлдаш, анестезиолог МяхIяммад ГIялихановли цугдуршу».
Ну операция барахъес разиикира, ва, чили наб операция бирусил, хьарбиулра.
- Чили бируси гьатIи хIед операция?! – ласяхъили набчи, ахъли викIар ил. – ХIед операция бируси саби Дагъистанна ва Россияла урибси тухтур, чебяхIси категорияла хирург, «ХIурматла лишан» орден бихуси хIела халаси узи ХIясбулла МяхIяммадовичли!
Дила иличи сегъуналра къаршидеш аги. Дила «халаси узини» наб бируси ил операция авэсил яра шуэсил биэс асубири.
ШайтIа лягIнат
ИтхIели ну школализив учительли узулри. Савли дарсличив ну зягIипикира. Серил балуй шайчиб изахъулри. Дурсрала ургабси переменаличив школала  мякьлабси медпунктлизи вякьи, се изулил бурулра.
 ЦабехI сукъур рудла кьяли бемднила изала бикIи, итдилти – ахIен, чули балуси селра агаркъира, лебилра наб гIякьлума бугьес бехIбихьиб. Ну биалли, хъули арякьунра.
Хъули саибхIейс, изала гьатIира цIакьбиуб, ну кьяшмачив тIашли уэс хIейраниубра ва сеналра райцентрлизибси больницализи ваэс кьасбарира. Дила машина аги. Ил багьандан хьурали Уркарахъи ватихьира. «Чила-биалра машина гIеббаалли, някъ ахъбуцили тIашиис, - пикриикIулри ну, – иличив ну больницализи ветиус». Вашес гьатIира къиянбухъун. Майъаливатурра. Рахли машинара сайра дила хьуна узи ХIяжи гIевхIеили виалри, хI****ас, мицIирли больницализи ветиасил яра хIейасил.
Операция барибси ХIясбулла МяхIяммадовичли бурни хIясибли, дила сукъур рудла дуб баргбердили буилри. «ХIу заманаличив набчи ваахъибси ХIяжис баркалла викIен, - викIар набзи ХIясбулла МяхIяммадович - Машиналичил ил хIед къаршихIейкибси виалри, мажахIят, вираси нуни хIу бебкIализивад верцахъес».
Операция барес багьандан наркозличил ускаахъунси нуни, муэрлизибван ишгъуна сурат чебаира: ну халаси къияйчил ахъси шурмала бяхIлизивад лаг айцIулри. Ахирра диркьличи ваира. Наб наркоз гибси МяхIяммад ГIялихановлизи иличила бурибхIели, ил викIар: «Ил бяхIлизивад дуравхъес хIейубси виадри, хIу вебкIибсири».
Операция барили гIергъи хIябэсил бархIи савли ну больницала азбарлизи  дуравхъунра. Илабси скамейкаличи кайили, папрус битIикIулри. БекIлизи гIяхIти пикруми дашулри: «ХIера, гьачам- гьатIи ну бебкIализивад верцахъира. ГIурра биркур наб мургьила гIебшни чедаэс. ГIуррара аркьясра вацIализи дугIла мицIирагличи гIяярли. ГIуррара чебиис дила юлдашунира».
ИлхIели дила мякьларад цIумла гIяшти тIама. Ласяхъирагу, мякьлав скамейкаличи кайили больницала палтарли вегIиубси, халаветаибси адам. «Папрус битIхIейкIули виалли, се  бирули гьатIи ишини ишаб, тамай шала хIедикили лерай?», - пикриикIулра ну.. 
- Се бетаурли хIед? Сен цIумикIулри, адавзи? – хьарикIулра илизи.
- ЦIумхIейкIес вирусу, аццила, варглизир цIа диалли, - язихъли чарбатур илини жаваб.
ГIур набзи сунечил кабикибси анцIбукьличила хабар буриб:
- Ну Сагаси Уркарахъив хIерирусира. Дай дугили, варг изули, «Къалабаси кумекла» машиналичив Огнила больницализи арукира. Илаб бусягIятал операция барили, хIябал метрцад рудала кьисбарили, варглизирад дурасиб. Изала беткахъиб. Камси заманали нура хъули вархьира. ГIергъила бархIи гIурра дарг изесдииб. Шагьарла больницала тухтуртачи бирхауди беткахъили, нушала ХIясбуллачи шилизи укьес пикрибарира. ХIясбуллани се изулил хьархъардяхъиб, варг изес бехIбихьес гьалаб се беркунрал хьарбаиб. Нуни итбархIи дахъал жунаб деркунра или бурира. «ГIяй, ацци, гIягIнилирив хIед илдицад жунаб деркес, - викIар ХIясбулла. –  ШайтIай бархли, илди хIедеркес хъябарили, лягIнатбушибси саби жунабличи. ХIела руди, жунабли дицIили, изути диэс асубирарну, операция барес чевкъар». Ил багьандан сайра ну шишимъайзи викибси. ХIябал метр рудла ишабра чеббушалли, дила варглаб се кавлуси?
ГIур ХIясбулла МяхIяммадовичличил къаршиикибхIели, нуни илизи баягъи ит шайтIа лягIнатличила хьарбаира. Юлдашли набзи иш хабар бурибсири:
-  Гьала хIеблизиб шайтIай цархIилти цIедешла галгубас гьалаб вавалибяхъибси жунабла галга чебаили саби. ЦIедеш хIунтIендиубли ва кIантIидиубли садаибхIейс цархIилтичиб гьалаб илдани букес или, шайтIан галгалиу цIуцIбиили саби. Ил куцличиб кали саби ца жумягI, кIел, хIябал. Жунабла вавнала рангли бухъутIбарили саби шайтIа цIудара гули. ГIурра камси замана дикила, кадикили сари вавни, ляркьули сари кIари. Жунабла галгалиуб шайтIан баз кабиили лебал – барсдеш агара. Кабиили саби ил кIиэсил базра – гIурра барсдеш агара. Жунабичир кьанни вавалидяхъибти цархIилти галгубачир дакIибти цIедеш адамтани ва мицIирагли дерки сари. ЧIянкIли жунабличирти цIедеш хIунтIеналра хIейубли лерал.
Жунабла галгалиу кабиили урегал баз дикибхIели, шайчи тIяхIбухъи, тудяхъили мякьлабси галгаличи, лягIнатбушибсири, бикIар, шайтIай жунабличи. ЦагьатIи баз яхIбарибси биалри, диркутири шайтIайс бизити цIедеш деркес, Амма сепайда? Ит бархIиличибад бехIбихьили, шайтIай жунаб дукути ахIен, бикIар.
«Эй, Чойбалсан, Чойбалсан!»
ИтхIели Уркарахъиб больницала ца юрт сабри лебси. Ил ца дерхIла юртлизир сарри поликлиникара зягIипти кабиркьути палатабира. Илдазибад ца халаси хъали хирургияла зягIиптас декIарбарилри. Яргаличилси операциялис гIергъи, ну ил хъули каркьира. Хирургияла палатализир нуша вецIал зягIипти лерри. Илала чеди, декIли зягIиптачи хIеруди бирути кIел-хIябал аратира. Гьайгьайрагу, илди лебтасалра дугели кабилхьес койкаби агартири. Гьанбиркур наб, набчи хIерикIуси дила тухум ХIямзат ГIямарович дила койкала мякьла чIябарличи калхьули. Нуйчивра халаси ва сайра зягIипси виубли хьалли, бамсри хI****уси, разиси, пергер адам вири дила кьариган ХIямзат ГIямарович. Ил нушала палатализибти лебилра зягIиптас кумекбарес валкьарулри. Илала чеди ХIямзат ГIямарович масхара иргъуси ва бурес балуси адамра сайри.
Дила мякьлав кайхьи леври, гьалабси бархIи ХIясбулла МяхIяммадовичли даргла операция барибси дила унрашан, букIун Мажид. Операция таманбиубхIели, чилирил илизи, масхаралис бурги, бекIлил шишхIейкIули, къакъличи кайхьи уахъес бурили уилри, илала хабчаблизи - муруйс дагъала нергъ хахъес. ХIямзат ГIямарович, ласяхъили нуша зягIиптачи, викIар: «Нергъ зягIипсилис, дагъа – нушаб».
Операция барила кIиэсил бархIи савли улкьайла гьалар дакIурухъун Мажидла хабчаб Султанат. ХIямзат ГIямаровичли ил бусягIят рагьур ва улкьай гьаргбарес дуцIухъун. Улкьайлабад нергъличилси бидон сунечи гьабатурмадан, ХIямзат ГIямарович, илала чебхьла урасили, ухIна хIеризур. «Ишар нергъцунгу лерти, диъ чинаба?» - аргъира нушани тамашавиубси ва гьимукIибсила дарибси илала тIама. «Набзи нергъли валхес гIягIнили саби», - иб, -- ил багьандан, диъ дурхIнани беркун», - жаваб чарбатур Султанатли. ХIямзатли бидоннизирадти нергъли кружка бицIиб ва Мажидлис гьабатур. «Гьарил бурибсиличи бирхарути адамти буилригу дила унра шанти»,- пикри бакIиб дила бекIлизи.
Нушала больницабазиб гIядат саби дагъала диълизирад дарибти нергъ зягIипсилис дедили, аратази диъ букахъни. Бурни хIясибли, нергълис лугьуси саби хIунтIена дагъа яра цIудара гIяргIя, тукентазир дирцути духъяна хъябкурарти чIукьати гIяргIнала нергъ зягIипсилис пайдаладирути ахIен.
Мажид хIябэсил бархIира алзули ахIен, алзули ахIен ил авэсил бархIира, шуэсил бархIира дяргIибти нергъцун сари илини дукутира. Урег-ибил бархIи савли обходличи вакIибси бекI тухтурли ил чеваиб. «Эй, Чойбалсан, Чойбалсан! СецадхIи хIу кайхьи уусири?!» -- викIули, иличи гъамиуб ва, хъянтIалавад уцили «Вашен хъули!» викIули, гьакIвариб. Палатализибти адамти лебилра дукарбяхIиб, декIли зягIипти бархли.
 ХIясбулла МяхIяммадовичли ил балу-балули зягIипти дукарбихIяхъес барибси хIянчири. ЗягIипти разибиахъес балуси адам сайри дила юлдаш, больницала бекI тухтур. «ХIясбуллани дурутани зягIипси, дармунти хIедужалра, сагъирахъу», - бикIутири иличила. Нуни ХIясбулла МяхIяммадовичла ил устадешличила балусири. ЧIянкIли ца секIал сабри нуни аргъес хIейруси: Монголияла маршал Чойбалсанничи кьялклан ВалкIа Мажидлизиб илцадра жявли мешудеш баргни.
ГIярала диълизирад дарибти чудни
ГIебшнила ва янила замана алхIят бархIи ну ши-алавси ургубализи гIяярвашусири. Нушала дубуртачир къаршидиркули дирар гурда, гIяра, бецI, хIявбецI, цура, дугелибуг ва цархIилти дугIла мицIираг. Илдазибад имцIали гIяра къаршибиркниличи ну дебали разииркули вираси. ГIярала диълизи гIяхIцад хиви дархаили, дила хьунуй бизити чудни дирни юлдашунанира балусири. Набчи гIяхIладли вакIибси ХIясбулла МяхIяммадовичлисра гIяхIдизурли дурги гIярала диъла чудни. «Нушани дахъхIи дерки ахIенра кьалли, гIярала диълизирад хIела хьунуй дарибти чудни. ХIела тупанг къяйкхIебикIули бургар», - викIули вири ил, набчил къаршиикибхIели.
Дила юлдашлис гьанбиркули бурги, гьар ну гIяярличи вякьунхIели, гIяра кабушили хъули бихули ургус или. НабкIун дусла духIнар ца-кIел гIяра сарри диркути. Илала чеди бурасли, бухъна гIярала диъ чудулизиб белхьахъесра вируси ахIен.
Или биалра, вираси кьалли нуни гIярала мерличиб белгьи дагъа, илала диълизирад  чудни дарахъес. Хиви имцIадаралри, гIяхIли шакхIебирки. Лебсири дила или барес пикри, амма бетхIеур. Бурули бирар, «адамли гьала хили пикрибиру, Аллагьли сунес дигусиван биру». Илкьяйда бетаурли бурги набчилра.
Гьачам районна центрлизи вякьунси наб больницала мякьлав къаршихIейкесу ХIясбулла МяхIяммадович. Дебали разивиубси ну илала някъ буцес къалабаикIулра. ВяхIлизивад вамкьурси дила юлдаш, набчи дугьавизурли, викIар:
- Се хIянчи сабри ит хIуни барибси?
- Се барира гьатIи? Нуни хIед хIейгеси секIал хIебирисгу, дила юлдаш.
- Баз гьалар хIуни нуша хIечи жидарили, хIу профсоюзла курсаначи МяхIячкьалализи вебшилри…
СейкIуси юлдаш или пикривикIули, ну гIяхIцадхIи хIякизурли калунра. Ахирра шакикира илини бурусиличи.
- ГIяй, хIела жан датла ХIясбулла МяхIяммадович, хIу хIурматла, районнизивра урибси динничи чекайзурси адамла урши! Кепкайубси адамли бурибсиличи илцадра жявли вирхарес асубирусив гьатIи хIед? – бусягIят баргира нуни буреси.
- ВяхI! Се ири? «Кепкайубси адамли бурибсиличи» викIуду? – викIар ил ва ахъли дукаряхIиб. Сунесра гIяхIбизурли бииши дила жаваб, чумлизира дуриб, бикIар, гIурра ХIясбулла МяхIяммадовичли илди дила дугьби.
ИлхIели гьанбикиб наб баз гьалаб набчил Уркарахъиб кабикибси анцIбукь. ГIебшнила нясси аргъла бархIи районна белчIудила отделлизив юлдашуначил вахъхIи кали, ну шалали лебай шилизи чарухъес валкьхIеурра. ЦIябдешлизив хьурали хъули аркьуси наб, сагаси больницала гьала ветаибхIели, пикри бакIили бурги  ну хъули ваахъес бекI тухтурлизибад машина сасес. АйцIулра юлдашла кабинетлизи. Илаб ХIясбулла МяхIяммадовичра илала юлдашунира баргира. Вирасив гьатIи ну илдазивад декIарикес? ХIера, илхIели бурили уилра нуни лебтазилра, гIергъиси бархIи савли гIярала чуднани букахъес набчи бакIахъес. Хъумкартурли уилра илхIели нуни, гIергъиси бархIи профсоюзла председательтала курсаначи МяхIячкъалализи аркьуси виъниличила. Курсаначивад чарухъунси набзи ХIясбулла МяхIяммадович юлдашуначил Дибгаши вакIниличила хьунуйра бурес хъумкартурли руилри. Ил багьандан, нуни ил анцIбукьличила балуси селра аги.
Амма, бусягIят бирхаурли кепсила гъайличи, бакIили саби набчи юлдашуни гIярала чуднани букес. Ну биалли, илхIели МяхIячкъалализив уилра. Ил анцIбукьлис гIергъи, нуни гIярас тупанг хIейгьес кьасбираси.
МяхIячкьалализирадси ралликьянала записка
ВиштIаси узила мекъла хIябэсил бархIи ну кайибси машиналичил бехIемцI бетаурли, дила чархлизир дячунти лигуби ва цархIилти дяхъурби диуб. ХIясбулла МяхIяммадовичли ил дуги МяхIячкьалализивад бегIлара урибси хирург-уролог   вертолетличив нушала районнизи вакIахъили, наб операция барахъиб. Ца жумягIла  гIергъи, ил тухтур сагадан живарили, цагьатIи операция барахъиб. Лигуби даси, аракайубла, наб чараагарли Ростовлизи укьес гIягIнилири, сунела метод хIясибли, академик Вадим Иванович Русаковлизи  операция барахъес. Бурули бакьира нушани, Русаковлизи операция барахъес багьандан, хIябалалра баз яргаличи кайзес гIягIнили саби или бикIули. ХIясбулла МяхIяммадовичли Ибрагьим ГIяхIмадханович Шамовлизибад В.И.Русаковличи наб ярга агарли операция барахъес тиладиладиличилси белкI сасиб.
Янила дуги бархIехъ, дила узи МяхIяммадра, ХIясбулла МяхIяммадовичра, нура поездличир Ростовлизи даира. Вокзаллизирад таксистли «Южный» бикIуси гостиницализи ардукира. Гостиницализир мерани гайчи хIерли, нуша жаняхIлизирти утначи кадиилри. БитIиб биэс ХIясбулла МяхIяммадовичлис хIерликайэс, илини дилара МяIяммадлара паспортуни сунези сасиб ва, илдачи сунелара чебихьили, гостиницала администраторла улкьайличи гъамиуб ва викIар: «Ишаб хIед МяхIячкъализирси хIела ралликьяна Светлана Ивановнала записка леб». Чурхси администратор дила юлдашличи ласряхъиб, пишряхъиб ва цархIилтанира бакьесли рикIар: «Сен саби дила подруга Светала арадеш? Сена илала биштIати? Левалу ца мерличив узули илала мурул, хIурматла Иван Иванович?»
Камси заманала духIнар, ил пергер хьунул адамли, тяп гьаларван пишряхъили, ХIясбулла Мяхяммадовичлизи нушала паспортуни чардариб. ХIясбулла МяхIяммадовичла паспортла бухIнаб нуша гостиницала кIел номерлизи мерладарахъес буйрухъбарибси белкIличилси кагъарла кIапIи лебри.
Сунела поспортлизи ХIясбулла МяхIяммадовичли кабирхьуси арц чехIебаибси виасри, нура вирхараси Светлана Ивановна бикIуси хьунул адам МяхIячкьалализир лерниличи.
ГIергъиси бархIи ХIясбулла МяхIяммадовичли Ростовла мединиститутла профессор, хабарли урибси доктор-уролог Вадим  Иванович Русаков варгиб ва наб операция барахъес иличил вягIдалавиуб.
ХIера, илгъуна сай дила юлдаш ХIясбулла МяхIяммадович МяхIяммадов. Ил гьанна гъамли 84 дус вируси сай. Ванаси замана сунела гIямрула рархкья ХIялиматличил Уркарахъив хIерирули сай, яни бугIярхIели – шагьарлизив, уршиличив. ХIясбулла МяхIяммадовичла урши МяхIяммад медицинала профессор сай. Тухтурти саби ХIясбулла МяхIяммадовичла рурсбира.
ВахъхIи пикривикIаси ну, сегъуна уличил бучIутас гьаладихьили гIяхIсил ХIясбулла МяхIяммадовичличила дила хабурти или. Игъбарлисван, наб гьандикиб Купринна «Гранатовый браслет» бикIуси повестьлизирадти ишди дугьби: «Да святится имя твоё» Ишаб «святится» ибси дев «славится» ибсиванра иргъуси саби. Или биалли, даргала мезли лебилра предложение «ГIурра хабардерхаб хIечила» бирар. Ил предложение  нуни юлдашличила дила хабуртала цахIнабси улизи халбирулра ва гIурра юлдашличи дугьавилзулра: «ГьатIира имцIали хабардерхаб хIечила, ахIерси ХIясбулла МяхIямадович».