Улкьайла кьасиличиб житала дурхIя

Дила биштIаси хабарлизиб наб бегIлара гъамти ва имцIали дигути биштIати дурхIначил ва илдала биштIаси хъа мицIирагличил кабикибси анцIбукьличила бурисра. Ил биубси саби Россияла югла шайчибси, урхьула дублаб мерлабиубси ца биштIаси шагьарлизиб.
Ил шагьарла дублаб, дахъал цархIилти сагати юртанала ургаб, ца халаси юртра леб.
Илаб авэсил дерхIличибси  квартирализиб биштIаси цIуба, шалубазир кьерхIе-духъутIа дамкънар житала дурхIя хIербирули саби. Илала лихIбира кьерхIе-духъутIа рангла сари. Ил сабицун саби хIербируси, сенкIун ил квартирала бегIти жагьилти неш-дудеш ва илдала кIел урши ила дуги беркIесцун саби башути.
ХIерируси сай чичил-биалра. Цунни хIерирусилис замана буркIули саби  бикIар. ХIебиалли бархьли бирар, житала дурхIялира сунес иш дунъяличиб ЧевяхIсини чебаахъибси замана буркIули саби дикIахIелли.
ВецIал дус виубси халаси урши Даник (Даниял) авъибил класслизив учIуси сай. ВиштIаси хIябал дус виубси Жамал биштIатала анхълизи вашуси сай.
Илдала бегIти чула квартира лебси шагьарлизибад саби бузуси ва хIербируси шагьарлизи машиналичиб 15-20 минутла бухIнаб биути саби. Илдала акьути бурхIнира  лерти ахIен.
Лебилра илди, бузутира бучIутира, савли хала бегIтачи башути саби, БархIехъ, бегIти бакIайчи, биштIати илдачиб кавлути саби, сут ва алхIят бурхIназиб биалли – абзур бархIилис. Чула хъулиб хIербируси житала дурхIя илдани савли ва бархIехъ кьанни саби чебиуси.
Гьари, ил житала дурхIя секьяйда илдачиб багьарбиубсил къантIли бурисра.
Гьачам бархIехъла замана  Расул ХIямзатовла уличилси кьакьалаб, машинаби дашуси гьунчиб, дурхIнала нешли ца биштIаси мицIирси секIал хIисаббариб, дурхIнала дудешли, хапли тIашаили машина, гьунчи дуцIухъи, нуша лебтанилра балуси хабарлизивси Герасимли шиннизибад кецIаван хапбарили, житала дурхIя сунечил арбукиб.
Гагаринна уличилси кьакьалабси чула кофейнялизи бетаибхIели, илдани кичIализир ниъ ил мицIир жанна гьала кадихьиб. Ил пякьир ниъли бужес бирули ахIенри. БиштIатас ил дебали язихъбизур биэс, Жамал висивииб.
Ил анцIбукь чебаибси ца кофели ужес вакIибси адам викIар: «Чараагарли хIяйвантала тухтурличи букес гIягIнили саби». БиштIатала бегIтани илини ибсира бариб. «БахъхIи  хIебукниличибли ишала кани бемдурли саби, - викIар тухтур. – Ванара биубли, букра букалли, лерил секIал цугкадиркур. УрухмакIудая».
Камси замана дикибхIели кофейнялизиб житала дурхIялис сегъуна у   гIяхIсил  суал ахъбиуб. Ит баягъи тухтур гьанушибси адамли бусягIят житас ура  баргиб: «ХIушала кофейнялис Краб-Club бикIалли, житас Краб бихьая». Лебилра кофели бужес бакIибтас, кIелра уршилис ва бегIтас ил духуси адамли бурибси у гIяхIбизур. «ХIушани сецад кофе держадалра, нуни ишдуги арц сахIейсис», - викIар житала уличи дебали разивиубси дурхIнала дудеш. «Краб! Краб! Ура!» - кофейнялизир разити тIама адердиб.
Ил дугил Даникра Жамалра Краб хала нешлизи ва хала дудешлизи чебаахъес хьулбухъун. Нушала шагьарла Редукторный поселоклизибси хала бегIтала квартирализиб абзур дуги шала хIебишун: илаб хIябал наслула урегал вакил зягIипси житала дурхIялис къуллукъбирули шала дикайчи калун.
Ахирра-ахир, Краб аракабиуб, ва илизир  жагаси житала лишанти дакIудухъун. Рахли нешра дудешра архIяличи букьялри, житала дурхIя Редукторный поселоклизиб дудешла бегIтачиб балтусири. Илаб бурсибиэс гIягIнисири ил улкьайла кьасиличи кабирес ва юртла дурарти гIямру руркъес. Белики, Крабли ил хасият хала нешлизибад гIебасили бурги: дигахъуси саби хала нешлисра, улкьайла мякьла кариили, дура хIеррикIес.
БусягIятра урхьула дублабси биштIаси югла шайчибси шагьарла дублав, чедиб гьанбушибси халаси юртла азбарлав къаршиикибси пулан адамлира, авъибил дерхIличибси улкьайлаб цIуба, кьерхIе-духъутIа дамкънар житала дурхIя чебаэс вирар. Савлиличибад хIерли саби ил сунела юлдашуначи.
БархIехъ сягIят урчIемлис жаняхIларад гунзрала тIама адердибхIели, тIяхIкабулхъуси саби ил улкьайла кьасиличибад ва дуцIбулхъуси саби унзала гьала. Ца сягIят илра Жамалра хIязтабиркьути саби, гIур ца кроватьличиб, хъябруцбикили, ряхIятли бускалъан.