Хала дудешлис савгъат

Ухънани, республикала жузи дурайуси издательстволизи ацIили, бекI редактор варгиб ва викIар:
- Наб кIел мезличил дила жуз дураэс дигулра. ХIера, иш кIелра мезли белкIунси жузла рукопись.
- ГIяхIна, - разиикиб редактор, - дурайэхIе кIел мезличил.
- Дила жуз чизи-биалра белчIахъесра гIягIнидеш агара, сенкIун ил чула хIянчи гIяхIил балути адамтани белчIунси саби. Жузлизи кадирхъути суратунира нуни валуси художникли дарили дигахъаси, - викIар ухъна.
- Юх, - разихIейкиб редактор. – Нушани дурайути жузази нушала художникунани сари суратуни дирути. Гьар мезличил белкIунси ахтардибирес нушала редактортира леб.
Редакторли дурибти гIяхIхIедизуркъи, ухъна разиикиб: бахъ дигулригу илис сунела кIиибил жузра дураэс .
- КIел-хIябал дуслира хIела жузличи ярга хIебиур бургар, - викIар ахирличив редактор. - Рахли чили-биалра сунела рукопись арбухалли, илала жузла мерличиб хIела дураэс асубирар.
- Ну кIел-хIябал дус хIерликайэс хIейрусну, чарбара дила рукопись, - разихIейкиб ухъна ва, касили столличибси рукопись, къалабали издательстволизивад дуравхъун.
Или биалра, къаршибикили гIяхIти адамти, ухънала жуз сунела нешла мезличил дураиб. Амма ухънас жуз урус мезличилра дураэс дигулри, сенкIун жузлизи кадерхахъурти хабурти илини гьаланачир урус мезли делкIунтири. Ил кIел мезличил лукIусири.
Камси замана дикили гIергъи, сунела ухънадешра пикридарили вииши, ухъна шагьарлизирти вегIдешла издательствоби даргес къяйцIухъун. Ухънани пикрибариб жуз 23 ибил февральла, ВатIан балтахъантала байрамла БархIилис дураэс: илини ил анцIбукь байрамлис сунени сунес бируси савгъатлизи халбирулри. Сунела тянишунази хьарбиули, ухънани хIябал-авал издательство даргиб, амма сенрил илдани дурути илис гIяхIхIедизур.
Чилирил илизи «Алеф» типографиялизи укьяхъес маслигIятбариб: бурни хIясибли, илар камси багьалис гIяхIси даражала жузи дурайули дуилри.
«Алеф» издательстволизиб илис цакамти жузи чIумаси мужаллатличил дарахъес гIеббуриб. Бурибси гIяхIбизур биэс, ухъна иличира бусягIят разиикиб.
Ухъна хIерлири гъамли сунела гIямрулизиб кабиркуси бекIлибиубси анцIбукьличи. Ухънани балули биэс гIягIнилири, гIур сунени жуз дурахIейъни. Жузлизи кадяхъести хабурти делкIес асубири, амма жуз дураэс, мажахIят, валкьари: излумани буцибси чархли гIеланачиб сунечила имцIали балахъулри. Ухънас жуз дураахъесра къалабаикес гIягIнилири.
ГIеларти бурхIназив ухъна издательстволизи имцIали зянкъикIи ва жузличила хьарикIи. ХIера,  байрамлис гьалабси бархIи иличи издательстволизирад зянкъдяхъиб, ва жузи ардухахъес хъарбариб. «Молодец уилрагу ну, - бизахъур ухънани. – Валкьаурра байрамлис наб нуни барибси савгъат касес».
Жузи хъули хес ухънас машина гIягIнисири. Илини уршбала уршбачи зянкъдяхъиб. БяхIмудра Ибрагьимра машиналичиб бусягIят хала дудешличи дурабикиб. Ухъна дебали разиирусири, илди кIелра узикьар барх чебаибхIели.
ХIябалра барх илди издательстволизи баиб ва хала дудешла хъули жузи хили чарбиуб. Хала дудешли, гIягIниси белкIра барили, илдас ца-ца жуз пешкешдариб.
- Гьари, аттата, байрамличил иш дила савгъатра кьабулбара, - викIар БяхIмуд ва сунела телефон бузесаиб. «Городок мне близок этот весь в весеннем цвету…», - илабад бегIлара ухънас дигуси далай зайбухъун. Ухъна, хIяйраниубли, далай таманбиайчи лехIли калун.
- ХIера, иш хIед ца дила савгъатра, аттата, - бузесаили сунела телефон, викIар Ибрагьим. «Опустился туман с Тарки–Тау и окутал мой город родной», - дурабикиб илабадра далайла тIама. «Илдигъунти дирути сари савгъатуни, дила ахIерти!, - кIапIбуциб ухънани дурхIнала дурхIни. – Халаси баркалла хIушаб, бегIлара дигути далуйти делчIахъи, наб дила  жагьхIелила гIямру гьандушнилис».
«ХIушани секьяйда багьурсира дила жагьхIелила заманала далуйтачила?», - хьарбиули хIилхIи калун ухънани. ГIяхIси бетаур ил хIебарнира, сенкIун камси заманали ил шакикиб дурхIнала дурхIнани сунела цаибил жуз бучIули биъниличи: ила каберхурсири «ЖагьхIелила заманала далуйти» бикIуси хабар. «ВяхI! – пикриухъун ил, - ишдани дила цаибил жуз белчIи буилигу. ХIебиалли кIиибилра бучIа». Ил анцIбукьли ухъна гьатIира разивариб. Илис сунела жузи дучIули ва илдачила гъайбикIули бахъ дигахъину.