Се савгъат баргесара Жамалли елкалиуб?

Сагаси Дусла байрам гъамбикIухIели, биштIати дурхIни мурталра  пикрибикIути саби, ДяхIила Хала Дудешли чус Сагаси Дусла дуги сегъуна савгъат кабихьесара елкалиу бикIули. Школала гIямрула дурхIнани, гьайгьайра, балули бургар, савгъатуни кадирхьуси  ДяхIила Хала Дудеш ахIенну, чула бегIти биъни. Дебали биштIатани биалли ил балуси ахIен, ва бахъхIи хIерли бирути саби илди ДяхIила Хала Дудешличи.
ХIера, нушала Жамалра дурусли хIябал баз гьар бархIи хIерли сай халаси тIерхьала вегI, хIунтIена хIякала вегI, цIуба муцIурла вегI, биштIатас савгъатунани бицIибси гавлагла вегI гIяхIяйчи. Сентябрьла 27-личив ил хIябал дус виубсири. ИтхIели илис савгъат лугуси чинирил цали бурили виэс гIягIнисири илизи, челябкьуси яргалис ДяхIила Хала Дудешли илис халаси ва жагаси савгъат лебхуси саби или.
Жамалли лебтазилра хьарбиусири, ДяхIила Хала Дудеш мурт лявкьусив викIули. Илис гьарилли чарбалтуси жаваб ца сабри: «ДяхIила Хала Дудеш Сагаси Дусла байрамлис лявкьуси сай. ЯхIбара».  СецадхIи яхIбарес вирусив виштIаси Жамалли? ИлкIун хIябал дусцун сайри виубси.
Лебтазилра ДяхIила Хала Дудеш мурт лявкьусил хьарикIуси Жамал хала дудешлис язихъизур виэс, илини сунени вируси тяхIярли виштIаси Жамаллис кумекбарес кьасбариб.
Бурес чебиркур, Жамалла хала дудеш ухънаваибси,   биркIантала излумани  инжитируси адам виъни. Ил хъуливад камли дураулхъуси сай. Рахли дураухъалра, мякьларти аптекализира тукеннизира сайри ил вашуси. ХIера, се бирулил Жамалла хала дудешли.
Гьар-мурталра аптекализи вашуси хала дудешли, илар рузуси рурсини сунес дармунти гьадалтуси биштIаси улкьайла тахличир халаси дарма хъапIаличи мешути цIуба дармунти  чедиулри. Гьачам хьарикIули сай ил баягъи илар рузуси рурсилизи:
- Селис гIягIнитив ишди хъапIначи мешути дармунти, дила ахIерси?
- Ишди хъапIни дармунти ахIенну, витаминти сари, хала дудеш, - ца хъапIа някълизи касили, рикIули сари ил. – Адамла чархлизирти дахъал излумачи къаршиси витамин C саби иш.
- Дила бамсурси ва гьар биркIан декIарбикес хIядурси чархлис, мажахIят, кумекбарес хIела витаминтани, дила рурси, гьари, бура, дебали виштIаси уршилис иш беркес асубирусив?
- ГIе, бируси саби. ХIябал дус биубти дурхIнас деркес асудирути ишди витаминти сари, - рикIули, гьабуциб ухънас «Аскорбинка детская» белкIунси витаминтала бергараг. – ЧIянкIли бархIилис 2-3-личир имцIа дукес асухIебирар…
ИлхIейчивад вехIихьили, ухънани, савли Жамал чучи вакIайчи, столличирти жузала бекIализи ца цIуба хъапIа  дигIянбирусири. Хъули ухIнаухъунси Жамал, дуцIухъи, жузала букIализив халтIухъи, витамин бурги ва халаси разидешличил викIи: «ДяхIила Хала Дудеш вакIили сай! ДяхIила Хала Дудеш вакIили сай!». «Марли вакIибу? Нуни чехIеирагу лявкьули. Чинавад ацIиба ил нушала хъули?» - викIули, кьяйцIикIи хъулив хала дудешра, гьаргдири унза, улкьай. Жамалли цIуба хъапIни хIерейсра бархIехъра дургутири.
Заманала бухъяндешли, камдизур диэс Жамаллис бархIилис дукути хIябал витамин. «Сен камли вашуси нушачи ДяхIила Хала Дудеш?», «Мурт лебхуси илини наб ит жагаси ва халаси савгъат?», - викIес вехIихьиб ил.
- Ваши, гьари, ухъна, Жамаллис мямбара  муридешунира кадирхьахIе, - рикIар гьачам хала неш. Илкьяйда дакIудиуб жузала ургар цархIилти мурити ва бизити секIулти: мамба, чупик, жура-журала кампетуни. Жамаллис илдира диули ахIен. «Живарагу, аттатта, ДяхIила Хала Дудеш. Сунени наб лебхуси халаси савгъатра хахъес бура», - дугьайзур ишди бурхIназив ил хала дудешличи.
Нушала Жамал бегIтачил, халал узи Даникличил ва Краб бикIуси житачил Каспийск шагьарлизив хIерируси сай. Халаси юртла авъибил дерхIличив. Илаб биршуси саби илдани чула елкара. Илав сагаси дусла цаибси бархIи гьанкIлизивад чевиргъуси сай ил. Се савгъат баргесара Жамалли елкалиуб?