Дагъистан, х1ечил дарх сарра

Дагъиста регионнизибси «Халкьла фронт» бикIуси республикала жамигIятла организация 2011 ибил дуслизиб акIахъубси саби, жигарчебли бузес 2014 ибил дуслизиб бехIбихьиб.


«Халкьла фронт»-лизи «Цаси Россия» партия, декIар-декIарти профсоюзунала, ветерантала, хьунул адамтала, баркьудила адамтала цалабяхъуни кадерхурли сари. Илизиб леб саби-гIяхIъулати кумекчиби, журналистуни, тухтурти, гIядатла адамти. «Халкьла фронт»-ла гьавкьяна Улкала Президент В.В.Путин сай.


Дагъистайзибси «Халкьла фронт»-ла исполнительный комитетлис бекIдеш дирули сай тарихла гIилмуртала доктор, ДГПИ-ла кафедрала профессор Ж.М.Шихабудиновли.
Организация, халкьла гIямрула даража ункъбиахъниличи дяхIчиаибти гIяхIцад бяхIчибизуназиб: регионнизирти миллатла программаби детурхни, бюджетла арц хьулчи агарли харждирни, гьундури сагадирнила даража, юртанала алавчарти мер-муса къулайси агиличи дуршни, гIурра дахъал цархIилтира республикала халкьличи челукьути масъулти гьунчидиркахънила даража ахтардибирули, къелгIеббикули бузуси саби.


СВО бехIбихьибхIейчибад «Лерилра чедибдешлис» ибси жилиуб бузери гьатIира жигарчеббариб. «Халкьла фронтли» дурчули, цаладирхъули, бургъантас палтар, техника, берк-берж дурхьули, халаси хIянчи бирули саби.


БегIлара халасигъуна бургъантас барибси кумекличила буралли, 14 тонна чараагарли хIяжатдиркути гIягIниахълумала дархьили сари. Илдала ургар лерри халаси цIакьла генераторти, блиндажуни дарахъес хIяжатдиркути далга, секIал чехIебиахъути (маскировочные) сетани, штабуназир дузахъес хIяжатдиркути техника.


Буйнакъсклизибадси 136 ибил мотострелковая бригадала бургъантас, танкабала полканас ванадеш лугути хутIла пушкаби, берк-берж, хIукуматла учреждениебала баланслизирад урасибти «Нива» машинаби дархьиб.


Ишдусла хIеблизир Дагъиста шагьурти ва шими шинни кIапIдарниличила лебилра улкалицунра ахIи, дунъяличибра бархли багьур. ИлхIели лебилра улкала халкь «Дагъистан нуша хIечил дарх сарра» бикIуси жилиуб кумекличил музабухъун. Шайчиб кахIелун «Халкьла фронт»-ра. Халкьла фронтлизибадти жагьти къиянти аги-кьяйдализи бикибтас кумекбирули бузулри, илдани шинни дуцибти юртаназибад урехиагарси мерличи адамти гечбирулри, Пальмирала, Ленинкентла, Мамед-къалала, Адильотарла ва цархIилтира мер-мусаличир шин супIдирути гIягIниахълумала кумекличил, хъулразирад шин дурадуршнила хIянчи дехIдихьиб. Саби-гIяхIъулати кумекчибани шинни кIапIдарибти юртаназибти адамтас дужути шин, берк-берж, дармунти, умудеш барес хIяжатдиркути гIягIниахълуми дихулри, цунтас, бухънабас, бахъал дурхIни лебти хъалибаргунас кумек гIеббиахъулри.


«Халкьла фронт»-ли лебилра улкали Дагъиста халкьлис кумеклис дархьибти 33 миллион къуруш дучиб. Илди арцлис шин супIдирути гIягIниахълуми, ванадеш гIеббурцути пушкаби, генераторти, газла печани асиб, зарайзи бикибти хъубзурас кумеклис Брянскла ва Астраханьна областуназирад 60 тонна картошкала гьела хиб. Дагъиста халкьлис кумекбирули «Халкьла фронт»-ли бурес агарли халаси хIянчи бариб, гIурра бирули саби.


Июльла 30-йчиб «Халкьла фронт»-ла вакилти Уркухъла шила халкь шинничил гIеббуцес чараагарли хIяжатдиркути турбаби хили Дахадаевла районнизи бакIилри.
Турбаби сари хIяжатдиркуси мерличи, Уркухъла шила гIела шайчибси майдайчи, машиналичирад черкасили хьурадариб. Илар, кIел километрличирра имцIали гьарахъси мер-мусаличирад Уркарахъи шин адукес пикрибарили, дуркъили хIядурдарили хандакьуни лерри. Кумеклис дархьибти турбаби хьурадирули шила ва районна администрацияла хIянчизарти абархилри.


Турбаби хили вакIилри, «Халкьла фронт»-лизив узуси журналист ХIябиб МяхIяммадов. Илини «Халкьла фронт»-ли саби-гIяхIъулали, чесибти къайгъначила къантI-къантIливан буриб: «Нушани СВО бехIбихьибхIейчирад «Лерилра фронтлис-лерилра чедибдешлис» ибси жиличил, бургъантас кумеклис дурхьути ваяхI дурчулри, дучибти бургъантачи диахъулри - динди, палтар, берк-берж, хIяжатдиркути гьар секIал.
Ишдусла хIеблизир Дагъиста шагьуртазир, шимачир шин чедидерхур. Дахъал дарибти заб-маркали ванзала хIусбулхъуни детаахъур, гIяхIцад адамти къиянти аги-кьяйдализи бикиб. Лебилра улкали иличила багьур, улкала Президент В.В.Путинни бучили улкала правительство совещание дураберкIиб ва «Дагъистан нуша хIечил сарра» бикIуси жиличил гьарил шайчибад республикалис кумекбарахъес хъарбариб. ИлхIели нушала организация халкьлис гьарли-марси кумек гIеббиахъули, бузес бехIбихьиб. Нушани халкьлизирад кумек хIяжатли биъниличила бурути дугьабизуни гьаннара дурчулра ва илдас кумек гIеббаахъес къайгъибирулра.


Гьалабван нушачи дугьабизур Унцукульла районнизибад, илаб Аракани шилизи шин кадукибси турба букьбуи буилри, нушани илдасра турбаби духили кумекбарира, илкьяйдали ЧIярадала районнизибадси дугьабиз бетурхахъули, Ириб бикIуси шилизи турбаби ардухира.


Иш гьакIлис кумекбарахъес нушачи дугьабизур Дахадаевла районна администрация. Илдас кIел километрличибра имцIали гьарахъси мер-мусаличирад шилизи шин адаахъес турбаби хIяжатлири. Нушани даэстачирра имцIа-имцIали, турбаби хIяжатси мерличи даахъилра. Турбаби ахъси даражала, дужути шиннис хасдарибти сари. Илди 50 дус дузесли дарибти сари, дерхIес, сигдиэс дирути ахIен, 20 дус кьалли, сеннира дузули кавлан», - викIулри турбаби хили вакIибси ХIябиб МяхIяммадов.


Дахадаевла районна администрацияли, «Халкьла фронтлис» халаси баркалла багьахъур ва бархьибси кумек разидешличил кьабулбариб.


Дахадаевла районна Уркухъла шилизи шин диахъуси турба ванзала хIусбулхъунани букьбуахъи саби. Ил сагабарес дахъал харжани ва халаси замана хIяжатли саби. Ил багьандан районна администрацияли шиличи гъамсигъуна, шинничил давлачебси урунжлизирад, Бускрила шиличи гъамси къадаларад Уркарахъи шин адукес сагати турбаби кадихьес пикрибарили саби.