Ил секьяйда иргъуси

ИшбархIи, алавчарси, бяргIибси космосла цIябдешлизиб, урхьула шинна хьанцIа рангли ухуси, чедашути ва ардашути урхьнала ругертани виштIасила сириван гардбируси, инсаниятла ца лебси, цархIил агарси хъали, дурхъаси Ванза дунъяла хIябъибил дергъла унабурхIличиб саби. Илди, Ближний Востоклизирти, лебил дунъя дявила цIализи гIелабушесли урехилати анцIбукьуназив гIяйибла вегI, я бурусила, я бирусила сегъуналра дазу-даража агарси Дональд Трамп сай или пикририкIулра.
Дунъяла адамтачи, нуша хIердируси ванза ахIерабарахъес Дурхъаси Аллагьли хъарбарибси саби. Чузибад чисалра зарал агарли хIербиахъес, лерилра ванзала мицIираглисван, адамтасра лерилра шуртIри Аллагьли акIахъубли сари, духули вяшбикIахъес гIякьлура бедили саби.


Сунени вяшдарибти, урхьула къачагъунала (пираты) баркьудлуми багьандан Дональд Трамп Аллагьлизивад урухкIули ахIенара или пикрирухъунра.


«Вирхулира Дональд Трамп Аллагьличи», - иличила Интернетлизи хьарбаира. Интернетли иличила селра балули ахIенри, сай биалли бахъал журналистунала гьалав гъайулхъули: «Нуни дирутачи Аллагьли пахрубирули саби, нуни христиантира, жугьутIунира ахIерабирулра», - викIули сай.


Ил улкала бекIдешличи лявкьухIели бурибси: «Лерил секIайчибра гьалаб Америка», - ибси жили дунъяличиб даршудеш кабизахъес хIебирни гьаланачибал якьинсири. СенахIенну, сай Германиялис бекIдеш дарес викIибхIели Адольф Гитлерла: «Нуша чеббикIибси миллатла (арийская раса) адамти сарра», - ибси жили, лебилра дунъяличи сегъунти балагь-кьадар хибтирил, дунъяла халкьли гьаннара хъумартурли ахIен.


Гьанна бусягIятла замана дунъяличирти тяхIяр-кьяйда дунъяла кIиибил дергъ бехIбирхьуси манзиллайчи, 1930-1940-ибти дусмачи мешули сари или пикририкIулра. ИтхIели Адольф Гитлерлизиван, гьанна Дональд Трамплизира «ХIу вархьли ахIенри», - или чилилра бурули ахIен. БусягIятла заманала, Америкала къачагъдешлизибад чис ва сегъуна хайри лябкьулил кепекуни, къурушми дуйгIули лерилра телевизорла каналти, Интернетла сайтани гъайдикIули сари.


Илдигъунти тяхIяр-кьяйдализиб цалилра пайда сахIерху, дургъбала кьурбунти дурчу, яра дунъяличи ахир замана хьурабиру.


Тяп гьанна Ближний Востоклизиртигъунти тяхIяр-кьяйда лертири 1930 ибти дусмала ахирлизир Европализирра – Америка, Англия, Франция лехIкахъили, Германиялизи Чехословакия, Польша, Востокла Европала улкни дуцахъес датур. Илди дуцили гIергъи, Гитлерли 40 бархIили Францияра буциб. Илала гIергъи сарри Англияра, Америкара чучира ярга биъниличи шакдикибти. ИтхIели адалкунти дявила цIа дишахъес багьандан 20 миллионничибра имцIали СССР-ла халкьлис жан кьурбандарес чебуркъуб, шагьурти, шими адамтала кьисматуни дуун. Илдицад халкьла кьурбунтачил: «Нуша чердикIибти миллатра», - викIуси Гитлерра ил гIевуцибти Германияла халкьра бархьли хIебиъни, лебилра дунъяличиб якьинбариб. Нюнбергла трибуналличиб такьсирчиби, «нацистуни», бурги къухIкадуцахъили, лебилра дунъяла халкьла гьала СССР-ла гIярмияла цIакьличил тIашкабатур.


Марли тарихли адамти селичилра руркъули ахIену?

Бархьси саби бурала: «Чи-биалра танбихIлаварес Аллагь хьулухъалли, илала гIякьлу кебисуси саби». Марли Дональд Трамплара гIякьлу Аллагьли кебасили бургар, яра лебил дунъяла декIдешличирра декIти бунагьуни сунезирад кадикибси Б.Нетаньяхула макрули ил виргIяиргили ургар.


Халаси улкалис бекIдеш дируси адам: «Нуни христиантира, жугьутIунира ахIерабирулра», - викIес секьяйда вируси. Илди гъай секьяйда иргъути. Илди ахIерабирули, бусурманти илини сен кабуршули? АллагькIун, лебталалра ца сай, жугьутIуналара, христианталара, бусурманталара, лебилра цархIилти дунъяла халкьлара. ЧевяхIси Аллагьли сеналра гъармукала някъ бурцуси ахIен.
Нуни рируси тяхIярли, уркIи-уркIиларад Дональд Трампла дирутачи ва дурутачил къаршидеш балахъулра.


Дональд Трамплаван, далкIтили чедиулра, Европала улкнас бекIдеш дирутала дурутира, дирутира. Илди чула ярагъличил бургъахъули, Украиналара, Уруслара халкь саби-ургаб алхахъес пикрибикIули саби. Германия, инсаниятла гьалар чула халкьли дарибти такьсиртачила хъумартурли, гIурра ярагълабирули саби.


Гьарил вайдеш булгуси, цархIилтас тIимкь кадирхьуси, сунела тIимкьли урцуси сай, сунени буркъубси къуюлизи сай ухIнакаркуси сай. Мурталра илкьяйда лебсири,
гьаннара илкьяйда бирар. 
Игитти Иранна халкьлис, чула гьарил гIяхIси пикри-баркьудилизив, ЧевяхIси Аллагь кумекливиубли дигулра.