Джыгъылмай туруу билинмез,
Ачымай къуанч сезилмез,
Хар табсыз болум бир дерсди,
Сынсанг ачыугъа хорлатыб,
Тюшсенг башхагъа къобартыб
Алай джашагъан бек терсди.
Руху кючлюде сан тууду,
Хылеу ёзлюде джан къууду,
Бу нарт сёзлени унутма,
Уруннган тёрге джарашыр,
Ёрлеген кёкге джанашыр
Сен талпыуунгу къурутма.
Кесинги тире джашаугъа,
Ышанма тигим - ашаугъа,
Бир кюн бериучю берелмез,
Къара сагъышны къоймадан,
Ахсыныуланы тыймадан
Сени тёнгегинг тирелмез.
Иннет - оюмну къургъучу,
Оюм - акъылны къыйгъычы,
Акъыл - хар затха амалды,
Джашау бичиминг - кёрюрюнг,
Муратха джолунг - ёмюрюнг,
Рух кючюнг джашау тамалды.
Джашаудан тюгеннгеннге
© Copyright: Софи Трам-Семен 2, 2026
Свидетельство о публикации №226111501381
Свидетельство о публикации №226111501381
Рецензии