Зейдулгъа

Джангур джаумайын джанкъылыч чыкъмаз,
Къыйын салмайын насыбынг чакъмаз,
Сюймеклик деген затны ичинде,
Сезиу бла толу ариу джигинде,
От да болады, джанынгы джакъгъан,
Суу да болады, кёз джашча акъгъан.

Сюймеклик деген боранча келир,
Къанат керирлей бир къудрет берир,
Алай, заман бла, аязгъа ушар,
Ол тюрлениу да джюрекни ашар,
Дунияда хар зат эски болады,
Сезиу да онгнга, кете барады.

Аллай заманда адамлыкъ керек,
Къуруб къалмазча сюймеклик терек,
Себебле чыгъыб, сезим онгнганлай,
Арадан эски джылыу  тайгъанлай,
Тёзюм бла англау юйюрню тутар,
Кетер сезимни ызына тартар.

Кёб зат болады  джашау джолунда,
Джазыу деген зат - аллах къолунда,
Хыянат болур, терслик этилир,
Джюрекге тийген терс сёз эштилир,
Алай барын да кечиу бла чёзген,
Болур муратны толгъанын кёрген.

Джангур джаумайын джанкъылыч чыкъмаз,
Къыйын салмайын насыбынг чакъмаз,
Сюймеклик деген затны ичинде,
Сезиу бла толу ариу джигинде,
От да болады, джанынгы джакъгъан,
Суу да болады, кёз джашча акъгъан.

2011.