Басхан сагъыш

Ёмюр барад къайтмаз джары,
Табалмайма  дарман – дары,
Джюрегими кюйгенине,
Тёзалмайма ёлгенинге…
Сенсиз Джерде джарыкъ - сёнгнгю,
Тар болгъанды кёкню кенгнги.

Сыннган бутакъ мылыланыб,
Къан тамгъанлай суун атыб,
Муал болуб асылгъанча,
Чакъ кюнюне таралгъанча,
Энди мен да алай болдум,
Танылмазлай тоза, онгдум.

Бош къаугъала эсге келе,
Джан хузурну таймай  бёле,
Бу джашаугъа  сансыз  къарай,
Онгнган тёнгнгек джанны сынай,
Кёлюм – тансыкъ, саным – суукъ,
Санга тюбер кюнюм джуукъ.

Къаллай джылла бош кетдиле,
Терс адамла терс этдиле,
Сюймегенле чалдыу сала,
Зарлыкъларын алай ала,
Биз да аны ангыламай,
Джюреклеге тынгыламай!..

Энди болур болду, кетди,
Къадар къара ишин этди,
Хар къуанчны  учу – бушуу,
Хар юйюрню арты – къуу – шуу,
Туууш джокъду,  ёлюм болмай,
Тёлюлеге  орун къоймай.

Ёмюр барад къайтмаз джары,
Табалмайма  дарман – дары,
Джюрегими кюйгенине,
Тёзалмайма ёлгенинге…
Сенсиз Джерде джарыкъ - сёнгнгю,
Тар болгъанды кёкню кенгнги.

2013.