Къуллукъчу шохха

Къарангыдан къарангыгъа биз барабыз тизилгенлей,
"Ёмюр" деген хыртды джолда джан да, сан да эзилгенлей,
Къара чарсдан, бир кесекге, баш къаратыб кюн джарыкъгъа,
Джашайбыз - деб къуанабыз, бара туруб джер джырыкъгъа.

Нек тууабыз, нек ёлебиз, айтчы шохум, биле эсенг,
Санны тюйюб мал джыйыуда бир магъана кёре эсенг,
Тоханада олтургъанла, ёлюм джетмез, ёргемилле,
Мискин болуб джашагъанла Джаратханнга ёгемилле?

Кёз къакъгъанча бир ёмюрде нек болгъанбыз тиклешиучю,
Онгсузланы хакъын къымыб аз къауумла юлешиучю,
Мал болумгъа кёре халкъны нек бёлгенбиз "башха", "тюбге",
Адамлыкъны нек сукъгъанбыз бери чыкъмаз къаты кепге?

Тик къалада джашагъагъаннга ёлюм кириб илешмезми,
Аны кёксюл тюрсюню бла, саны суууй бетлешмезми,
Джаратханны кёк - тёрюнде анга соруу сорулмазмы,
Гюнах, сууаб чекген базман аны ючюн къурулмазмы?

Дунияда хан, бий, алим джазыуундан къалалдымы,
Кёк Уллугъа улху бериб ёмюр джашар болалдымы,
Да нек болдукъ былай малкёз, азат къагъыт алгъанлача,
Джаратхандан "ёлмезлик деб" кесаматлы болгъанлача?

Джаратылгъан - бары тенгди, тенглешейик, айырмайын,
Онгзузлагъа джакъ болайыкъ, Хакъгъа джалкъа къайырмайын,
Байлыкъ деген джан джылыуну башхалагъа бергенингди,
Ахыр кюнде сыйлы этер дараджалы керегингди.
2018.