Ачыудан айтылгъан сёзле

Госдумадан бу кюнледе джангы хапар эштилгенди,
Налог ырхы таугъа, тюзге, ура-джыгъа тёгюлгенди,
Къол ишлерин сатхан бары энди джасакъ берликдиле,
 Джангы келлик шартладан да "уллу насыб кёрлюкдюле".

Бир зат къалмай, болгъан затны багъасына къошулгъангды,
Даулетдеги бютеу хазна "артмакълагъа" ташылгъанды,
Гудуланы гудулугъу законла бла къорулгъанды, 
Алай бла бир къауумгъа  хюр дуния къурулгъанды.

"Халкъны насыб джашауундан" юлюшлерин алгъанлагъа,
Аманлыкъчы адамлагъа  чёб атаргъа баргъанлагъа,
Тыйыншсызны тыйыншлы этиб ёргелеге салгъанлагъа,
Терсге къуллукъ этиб  алай къабар къабын табханлагъа,
Мангырамаз токълулача кёрмей-сезмей тургъанлагъа,
Джау кючле бла ортакъ болуб мыйыкъларын  бургъанлагъа,
Айтылыр сёз бар эди да, тил бармайды, "буса" дерге,
Быллайланы джазыу элтсин артха къайтмаз узакъ джерге!
 
Советлени сюймегенле, хайда, энди къуаныгъыз,
Демократик  законла бла, джангылыкъгъа алланыгъыз!..
Кёб турмайын хауа ючюн миллет джасакъ тёлерикди,
Ол заманда  "евро" болуб, "дараджабыз  ёсерикди".

Халкъ сант болса, къайарыла бийлик этер боладыла,
Бий болургъа эркинликни матух халкъдан аладыла,
"Халкъгъа кёре - башчылыгъы", керти сёздю бу нарт сёзю -
Къалмагъанча кёрюнеди Эресейни миллет ёзю.

Госдумадан бу кюнледе джангы хапар эштилгенди,
Налог ырхы таугъа, тюзге, ура-джыгъа тёгюлгенди,
Уакъ-уакъ бууа баргъан джиб боюннга тагъылгъанды -
"Демократия джандет"да ачыкъ бетден танылгъанды.
28.10.2018. Владикавказ.