Анамы насихатлары

(анамы дерслеринден)

Джекге ичинги тёкме,
Мискин болгъанны бюкме,
Сени сюйгенни тюртме,
Биреуге джаулукъ этме.

Чакъырылмасанг барма,
"Итни" итлик бла урма,
Къонакъгъа джарыкъ къара,
Къарыусузлагъа джара.

Ашхы адамдан тайма,
Аманны джуукъ къойма,
Къызгъаныб артха салма,
Чомартлыгъынгдан талма.

Аман хапарны джайма,
Сёзчюню юйге джыйма,
Хоншу къарнашдан - джуукъ,
Аны бла болма суукъ.

Кертини энин къыйма,
Тилеб келгенден тыйма,
Башханы затын алма,
Элинг этгенден къалма.

Кючюнг джетмезни тартма,
Сингдирмезинги къабма,
Аман  бла джолгъа кетме,
Кишиге зарлыкъ этме.

Кирленнген суудан ичме,
Саугъагъа багъа бичме,
Къартны джюрегин сыкъма,
Уллуну сыйын джыкъма.
 
Биреуню ишин ойма,
Адет - тёрени джойма,
Мырдыда юй тюб салма,
Халкъынгдан айры къалма.

Харам ырысхы этме -
Алай муратха джетме,
Ата джуртунгдан кетме -
Башха топракъгъа битме.

Малгъа джутланнган болма,
Тин ёсюуюнгден къалма,
Миллет джанынгды, атма !
Даулет джагъынгды, сатма!
1980.