/анамы дерслеринден/
Къоркъууну кёзю – бадыра,
Ол келсе, белни къатдыра,
Къаты турлукъса, батырча,
Бёгеклик кёлге къайтырча,
Тюбесенг, тик тур, бюгюлмей,
Акъылынг тюйюм тюйюлмей,
Унутма, къоркъакъ минг ёлюр,
Батыр хорламны минг кёрюр.
Къоркъууну кёзю – бадыра,
Хар кёлекгеден къачыра,
Ол бюгер сени, бой салсанг,
Аны хауасын солусанг,
Анга къаршчы тур, къачмайын,
Къойма тамалын чачмайын,
Унутма, къоркъакъ минг ёлюр,
Батыр хорламны минг кёрюр.
Къоркъууну кёзю – бадыра,
Джан хузурунгу чачдыра,
Ол турса сени аллынга,
Тюрлениу салса халынга,
Илгизлик этсе титретиб,
Этмезлигинги этдириб,
Унутма, къоркъакъ минг ёлюр,
Батыр хорламны минг кёрюр.
Къоркъууну кёзю – бадыра,
Къоркъакъ - къоркъуун ышыра...
Ёхдем а джюз бла бетлешир,
Ёлюм – къалым – деб демлешир,
Хорлам да алыр кюрешде,
Онглу да болур сермешде,
Унутма, къоркъакъ минг ёлюр,
Батыр хорламны минг кёрюр.
2014
Къоркъуу келсе
© Copyright: Софи Трам-Семен, 2019
Свидетельство о публикации №219012200774
Свидетельство о публикации №219012200774
Рецензии