Джауларыма

Джарлысыз, хариб, зауаллы джаула,
Мийик этмелле сизни нюр таула,
Акъыл - гёзенлик, кёлле - багушлукъ,
Турасыз сёз бла болуб тауушлукъ.

Суугъа кёмдюгюз - толкъундан тутдум,
Отда джакъдыгъыз - ёртенни джутдум,
Кир сёз атдыгъыз - къулакъны джабдым,
Баргъан джолума джанымы атдым.

Джашауум болду  тикге чыкъгъанлай,
Таш ортасында тамыр атханлай,
Бетиме къаты джелле ургъанлай,
Джанымда джаллы сюрюу тургъанлай.

Сиз а, алгъынча, къараууз тартыб,
Зар сыфатыгъыз айбатын атыб,
Мени кёргенлей ауруулу бола,
Турасыз башла лагъымдан тола.

Тар джюреклиле, бош къыйналасыз,
Мени ызымдан бош айланасыз,
Сиз салгъан ачы манга кюч берди,
Сизге тиреле онгум кенгерди.

Джыгъыла - тура сизден къутулдум,
Сюйген ишиме кёлден тутулдум,
Кече кюн демей къазауат этдим,
Бюгюн кюннге да алай бла джетдим.

Энди къаламым - сёлешген, айтхан,
Къатыбетлени джуабха тартхан,
Болдум сизлени  кёрмей ётюучю,
Сиз джюрюялмаз джолда кетиучю.

Фахму - Аллахдан, болум - кюрешден,
Не хайыр барды бу зар эришден?..
Биреу бойлуду, биреу - джайракъды,
Аны этген да Кёкгеги Хакъды.

Джарлысыз, хариб, зауаллы джаула,
Мийик этмелле сизни нюр таула,
Акъыл - гёзенлик, кёлле - багушлукъ,
Турасыз сёз бла болуб тауушлукъ.

2018. Карачаевск.