Таурух

/анамы дерслеринден/

Нюзюр, Умут, Мурат, Сезим, Акъыл бла  Анг,
Олтурдула, лахор эте, джарыгъынчы саргъылдым танг:
Сёлешдиле, айтышдыла, сёзден сёзню чыгъаргъанлай,
Алай бла, чурум чыгъыб, башладыла тартышханлай.
Нюзюр - деди, мен болмасам Адам ишге талпымаз эд,
Аны ючюн джашауунда кереклиси табылмаз эд,
Менме аны, талпындырыб, хар кюн сайын урундургъан,
Этгенине къуандырыб, кёл кёлтюртюб къуандыргъан,
Мен болмасам Адам улу ма бу Джерде джашаялмаз,
Къыйын салыб, терин атыб, халал ашын ашаялмаз, -
Деди  Нюзюр, шох къауумгъа огъарыдан  тикбаш къарай,
Къалгъанладан кесин онглу,  орну  толмаз бирге санай.

Умут Нюзюр таба къарай, селекелеб башын бурду,
Бир талайны сёз къурарча, тынгылау бла  алай турду,
Сора деди - сени ишинг манга  элтир джолну ачыу,
Ал атламны этдирирча,  алландырыб  алгъа тартыу,
Сен, учумда,  мен ишлетген бир амалсыз керегимсе,
Хар ишимде билек болгъан  байламлымса,  бёлюнгнгюмсе,
Сен  къаш къырыб, бош къарайса мени таба,  Нюзюр - шогъай,
Мен  кюч берген тотур кесек,  уллу кёллю болма алай,
"Тутхан джибни юзме" - деген нарт сёзню да эсге ала,
Тынч турсанг а, айтдырмайын болумунгу,  камсык бала, -
Деб, Нюзюрню махданнганын  Умут кесиб таргъа тыйды,
Ол да,  къашын-башын тюйюб, терс къарамын къыйыкъ къыйды.

Мурат турду джукъ айтмайын, бу даулашха шагъат болуб,
Сора айтды  кёлюндегин, шохлукъ тута, ёрге туруб:
Тюзюн айтсакъ, экигиз да манга къуллукъ этиученсиз,
Адам манга келир джолда, аны бла джюрюученсиз,
Мурат болмай - Умут джокъду, Умутсуз а Нюзюр болмаз,
Адам улу менсиз къалса,  бир иши да  онгмаз, толмаз,
Менме аны, джулдуз кибик, кенгден джарыб джарытыучу,
"Джет манга" - деб, алдан-алгъа, къаджыкъмайын атлатыучу,
Экигиз да тынч болугъуз, менме сизге болум  берген,
Алай бла Адам улну  кесим таба бузмай элтген,
Деб, Мурат-бий,  кесин  тёрге тыйыншлыча тёреледи,
Бир ишексиз, башхаладан кесин артыкъ  ёргеледи.

Сезим кесин уф-чуф эте, даулашыугъа къатышмайын,
Талай заман къараб турду, бирине да джан басмайын,
Сора айтды: къарайма да, ючюгюз да кемсиз гагай,
Сууну суугъа къуйгъан кибик, магъанасыз сёзню чайнай,
Мени сансыз этген кибик, мени таба нек къарайсыз?
Тёзюмюмю таусдуруб, сёлеширге нек зорлайсыз?
Менсиз сизден не хайыр бар, айтсагъыз а, зауаллыла?
"Сезим болмай талпыу джокъду"- дегендиле акъыллыла,
Мен джюрекни, кёлню, ангны тотурум бла къайнатмасам,
Адам саннга талпыу салыб, джан -тёнгекни ойнатмасам,
Мурат, Нюзюр, Умут да джокъ, менсиз Джер да бетин атар -
Ма алайды болум, тенгле, кёлкъалдыусуз керти хапар.

Джууаш халлы, къарт адамча  ышарылды Акъыл,  къараб,
Бу шохланы тартышыуун керексизге, сантха  санаб,
Сабыр айтды - тартышмагъыз, кёкреклени тургъузмагъыз,
Къаугъа джелни  онгдан - солдан кесигизге урдурмагъыз,
Барыгъызны джюрютюучю, этдириучю, джетдириучю,
Сиз бузгъанны, эсеб этиб, таймагъанлай тюзетиучю,
Санны, джанны бауун юзмей, тинтиб, джалгъаб  джашатыучу,
Барынгы да болур къылыб, Адам кёзню джашнатыучу,
Джаратхандан келген зинни тюшюнюу бла оюм  этген -
Менме сизни ишигизге  къап,  бичим да, чек да чертген,
Деб къарт Акъыл  баш джеринден,  тамадача, онг-къарады,
Барысын да акъыл берген къарамы бла тик тарады.

Былайда уа Анг бу къызыу аралашха  кесин къошду,
Уллу кёллю тенглерине къарай-къарай талай шошду,
Сора деди - Анг болмаса, болгъан затны ким джазар эд?
Бютеу Адам билгенлени, кюнден-кюннге ким сакълар эд?
Ётген затдан дерс алдырча,  Акъыл, санга кирмеймеми?
Алам чакъдан билим тотур тартыб санга иймеймеми?
Анг Джан бла байланыбды,  Джан  - урхуду  Джаратхандан!
Къалай дженгил буруласыз сизни джокъдан болдургъандан?
Кёк Уллусуз  - Джан болмаз эд,   Джансыз - мен да къурур эдим,
Бош аламда калак болуб,  джел бурхуча  турур эдим,
Менсиз а сиз  Дуния чакъгъа былай ёхдем  келмезегиз,
Былайда да бу къаугъаны, тартынмайын, этмезегиз.
Рахман бла Джанды  бютеу  джашау чакъны башлангычы -
Алайды да думп-тас  болсун  барыгъызны джангылычы.

Нюзюр, Умут, Мурат, Сезим, Акъыл салпы-салындыла,
Онглу Анг бла бетлеширге, демлеширге  тартындыла,
Айтылгъанда чий табмайын, Ангнга сый бла къарадыла,
Хар бири да орнун алыб  къуллукъларын  башладыла.
Эртденги кюн джерайыкъны къызыл нюр бла джарытханлай,
Адам турду,  кенг дуниягъа джарыкъ кёзюн къаратханлай,
Нюзюр тартыб,  келген кюнде этеригин  белгилетди,
Умут кесин эскертди да,  бютеу санын тирилетди,
Мурат  кёк бла бирлеш болуб,  аны тартды узакълагъа,
Акъыл эсе, тюшюндюрюб,  эсеб салды  боллукълагъа.
Адам джангы кюнюн башлай - "шукур санга, Раббим"- деди,
Олсагъатлай  Хакъдан - Джаннга,  Джандан - Ангнга хурмет келди.