Исмаил Семенов - Джырчы тенгими Кавказгъа чакъыра

ИСМАИЛ СЕМЕНОВ /ДЖЫРЧЫ СЫМАЙЫЛ/

Джырчы тенгими кавказгъа чакъыра...

Минги тауну кёргенмисе, айтчы, шохум, сен?..
Ийнан сора болгъанынга насыбынгдан кем,
Минги тауну бир кёрмеген мийиклик билмез,
Махар суудан бир ичмеген сусабын кесмез.

Кел, барайыкъ, тубан джатхан акъ къаялагъа,
Андан сора тигелейик чегет чатлагъа,
Джашил гелеу отлаулада малгъа къарайыкъ,
Кюмюшшюркъа Къобан сууда чачны тарайыкъ.

Танг алада сюрюучюге салам берейик,
Андан озуб, ёзен таба, элге келейик,
Сен кёрюрсе Къарачайны чурумун, тоюн,
Таулу халкъны, тау этекде борбайын, боюн.

Минги таугъа къарагъанлай кёл кёкге тартар,
Джюрегинг да, сезиу толуб, тебиниб атар,
Илячинни сюзюлюую къанат битдирир,
Шам -чегетни шуулдауу джырла этдирир.

Кел, созма да, джол усталыкъ этейим санга,
Къарачайны берекети джарашыр джаннга.
Бу джерледе мурат толур, тюзелир иннет,
Шохлукъ борчха ажымсызды Къарачай миллет.
1935дж. Москва.